चन्द्रनिगाहपुर (रौतहट), २० वैशाख । मधेश प्रदेशका मुख्यमन्त्री सरोज कुमार यादवले संघीय सरकारले प्रहरी तथा कर्मचारी समायोजन गरिदिए २४ घण्टामा अपराध नियन्त्रण गर्ने दावी गरेका छन् । विश्व प्रेस स्वतन्त्रता दिवसको अवसरमा नेपाल पत्रकार महासंघ मधेश प्रदेश कमिटीको आयोजनामा रौतहटको चन्द्रनिगाहपुरमा आयोजित मधेश प्रदेश सञ्चार सम्मेलनलाई सम्बोधन गर्दै मुख्यमन्त्री यादवले संघीय सरकारले प्रदेश सरकारलाई अधिकार प्रत्यायोजन गर्न नचाहेको गुनासो व्यक्त गरे ।
उनले प्रदेश सरकारसँग आफ्नो कुनै संयन्त्र नभएकाले कार्य सम्पादन गर्न निकै गाह्रो भइरहेको गुनासो गर्दै संघीय सरकारले भ्रष्टचार नियन्त्रण गर्न नसक्ने दावी गरे । ‘संघीय सरकारबाट यो देशमा कहिल्यै भष्ट्रचार नियन्त्रण हुँदैन्, यो मेरो दावा छ’ उनले ठोकुवा गर्दै भने, ‘तर प्रदेश सरकारले नियन्त्रण गरेर छाड्छ । प्रहरी समायोजन, कर्मचारी समाजोजन गरिदिनु २४ घण्टाभित्र म अपराध नियन्त्रण गर्छु ।’
उनले प्रदेशलाई अधिकार सम्पन्न बनाए मात्र जनअपेक्षा बमोजिक काम गर्न सक्ने बताउँदै संघीय प्रहरी र कर्मचारीले प्रदेश सरकारलाई वेवास्ता गर्ने गरेको अनुभव सुनाए । ‘हामी आज यो कार्यक्रममा आयौं , एसपी, सिडियोलाई मिटिङ्ग परिहाल्यो’ उनले गुनासो गर्दै भने , ‘जुनसुकै कार्यक्रममा एसपी , सिडियो बसेको हुन्छन् तर मुख्यमन्त्री पुगेपछि उनीहरुको जरुरी मिटिङ्ग परिहाल्छ । उनीहरु बस्न चाहँदैनन् ।
अर्को एक प्रसंगमा उनले प्रदेश सरकारले पत्रकारहरुलाई चाहिएको सहयोग गर्न सदैव तयार रहेको जनाउँदै पत्रकारहरुले पनि तथ्यमा आधारित भएर समाचार सम्प्रेशण गर्नुपर्नेमा जोड दिए । नेपाल पत्रकार महासंघका केन्द्रीय महासचिव श्याम बञ्जाराले संचालन गरेको सो कार्यक्रममा प्रतिनिधि सभा सदस्य देव प्रसाद तिमल्सिना, प्रदेश सभा सदस्य युवराज भट्टराई ‘समिर’, कनिष पटेल , नेपाल पत्रकार महासंघका केन्द्रिय सदस्य शिव पुरी, केसी लामिछाने, मधेश प्रदेश अध्यक्ष राजेश कुमार कर्ण लगायत मधेस प्रदेशका ८ वटा जिल्लाका सञ्चारकर्मीहरुको उपस्थिति रहेको थियो ।
प्रतिक्रिया दिनुहोस् !