वीरगंज (पर्सा), १५ वैशाख । वीरगंजको गण्डक स्थित नेपाल मेडिसिटी बयोधा हस्पिटलले उपचारका नाममा बिरामीलाई ठग्ने गरेको घटना सार्वजनिक भएको छ । हस्पिटलले उपचार नै नभएको शिर्षकमा बिल बनाई शुल्क असुली गरेको घटना बाहिरिएको हो । सोही अस्पतालमा उपचारार्थ रही मृत्यु भएका जितपुरका २७ वर्षीय विजय कुमार बरईका आफन्तले आरोप लगाएका छन् ।
मोटरसाइकल दुर्घटनामा परि गम्भिर घाइते भएका बारा जितपुर सिमरा उपमहानगरपालिका – २ का २७ वर्षीय विजय कुमार बरइलाई गत मंगलबार राति १२ बजे नेपाल मेडिसिटी बयोधा हस्पिटलमा भर्ना गरिएको थियो । तर उपचारका क्रममा उनको बुधबार बिहान ११ बजे मृत्यु भयो । बरइको मृत्युपछि शव बुझ्ने क्रममा आफन्तलाई हस्पिटलले ४ लाख ८० हजार रुपैयाको बिल थमाएको थियो । तर आफन्तले बिलमा उल्लेख शुल्कको शिर्षकहरू शंकास्पद रहेको भन्दै विवाद गरेपछि अस्पतालले ३ लाख १० हजार रुपैयाँ मात्रै लिएर शव आफन्तको जिम्मा लगायो । तर उक्त बिलमा एउटै उपचारको पनि अलग अलग शिर्षक राखेर रकम जोडिएको मृतकका आफन्तहरूको भनाई छ ।
अस्पतालको ठगी प्रकरणबारे पत्रकार सम्मेलन गरि मृतक बरईका दाजु अजय कुमार चौरसियाले नेपाल मेडिसिटी बयोधा हस्पिटलले बिरामीको उपचारभन्दा पनि बिरामीलाई ठग्दै आएको आरोप लगाए । बरईको उपचारका क्रममा टाउको शल्यकृया गरेबापत अस्पतालले अनेक शिर्षकको शुल्क जोडेर रकम असुलेको चौरसियाको आरोप छ । उनका अनुसार अस्पतालले दिएको बिलमा सर्जन चार्ज (अप्रेशन गर्ने डाक्टरको शुल्क) १ लाख ९२ हजार ५ सय र अप्रेशन चार्ज १ लाख ५ हजार रुपैयाँ उल्लेख छ । यस्तै एनेस्थेसिया चार्ज (शल्यक्रिया पुर्व बिरामीलाई अचेत बनाउने शुल्क) ५२ हजार र प्रोसेजर चार्ज (शल्यक्रियाको तयारी शुल्क) २० हजार रुपैयाँ पनि बिलमा उल्लेख छ ।
मृतक बरइका दाजु चौरसियाले भने, ‘सर्जन चार्ज र अप्रेशन चार्ज अलग अलग किन ? अप्रेशन डाक्टरले नै गरेका हुन्, त्यसो भए सर्जन चार्ज छुट्टै लिनु कहाँसम्मको जायज हो ? यो त सरासर लुटतन्त्र हो । अप्रेशन गर्नुपूर्व बिरामीलाई अचेत पार्न एनेस्थेसिया चार्ज बापत पनि छुट्टै ५२ हजार र अप्रेशन गर्ने डाक्टरले गर्नुपर्ने तयारी (प्रोसेजेर चार्ज) बापत पनि छुट्टै २० हजार लिएकोले यो पनि ठगी नै भएको उनको भनाई छ । यसका अतिरिक्त भेन्टिलेटर चार्ज प्रतिदिनको ४ हजार ८ सय लेखिए पनि अस्पतालले २४ घण्टा भेन्टिलेटरमा राखेबापत दोब्बर शुल्क लिएको चौरसियाको भनाई छ ।
उनले नेपाल मेडिसिटी बयोधा हस्पिटल अकुत सम्पति कमाएकाहरूले मात्रै उपचार गर्ने अस्पताल रहेको बताए । यो अस्पताल उपचार सेवाका लागि नभई व्यपारका लागि मात्र खोलिएको चौरसियाको भनाई छ । बिलमा अनावश्यक चार्ज जोडेको गुनासो लिएर अस्पतालका प्रशासन प्रमुखकोमा पुग्दा उल्टै उनले हामी सेवाका लागि होइन व्यापारका लागि अस्पताल खोलेर बसेको जवाफ दिएको सुनाए । अस्पतालले अप्रेशन चार्ज जोडेर लिएको भएपनि अप्रेशन नै नगरेको आशंका पनि रहेको चौरसियाको भनाई छ । शुरुमा अप्रेशनका लागि भनेर ४८ हजार रुपैयाँको औषधि मगाए, तर अप्रेशनपछि ४० हजारको औषधि त फिर्ता गराइदिए, अब भन्नुस् ८ हजारको मात्रै औषधीले कसरी अप्रेशन भयो होला ?’
चौरसियाले आफ्नो भाईको मृत्यु भइसकेको भएपनि अस्पतालले गर्दै आएको ठगीमा अरू बिरामी नफसुन् भनेर सन्देश दिन अस्पतालको ठगीबारे पर्दाफास गरेको बताए । यता अस्पतालकी मेडिकल सुपरिडेन्टेण्ट (मेसु) डाक्टर स्वेता झाले भने मृतक बरईका आफन्तले लगाएको आरोप निराधार भएको बताइन् । नेपाल मेडिसिटी बयोधा हस्पिटल पारदर्शी रुपमा काम गर्दै आएको उनको दाबी छ । अरू हस्पिटल जस्तो हामी बिरामी र आफन्तलाई भ्रममा राख्दैंनौ, जे जे उपचार भएको हुन्छ बिलमा त्यसको चार्ज स्पष्ट रूपमा लेखेर दिन्छौं, हाम्रो जस्तो पारदर्शी अस्पताल सायदै अरू कुनै होला ? भन्दै हस्पिटलको उपचार र सेवा सुविधा सम्पन्न भएकाले अरू अस्पतालको भन्दा आफूहरूको उपचार शुल्क केही बढी नै रहेको बताइन् ।
प्रतिक्रिया दिनुहोस् !