कलैया (बारा), १३ वैशाख । निर्वाचन आयोगले बारा निर्वाचन क्षेत्र नं २ मा राष्ट्रिय स्वतन्त्र पार्टीका उम्मेदवार रमेश खरेलसहित ३१ उम्मेदवारको जमानत जफत भएको छ । आयोगले प्रतिनिधिसभा सदस्यका लागि आइतबार सम्पन्न भएको उपनिर्वाचनमा १० प्रतिशत मत नकटाउने उम्मेदवारको जमानत जफत गरेको हो ।
निर्वाचनमा कुल सदर मतको १० प्रतिशत मत नल्याउने उम्मेदवारको जमानत जफत हुने प्रावधान छ । आइतबार भएको उपनिर्वाचनको आज बिहान सकिएको मतगणनाको अन्तिम परिणाम अनुसार खरेलले २ हजार ८२९ मत पाएका छन् । बारा–२ का मुख्य निर्वाचन अधिकृत मुकेश उपाध्यायका अनुसार ६९ हजार २२ मत खसेकोमा ६८ हजार १९२ मत सदर भएको छ । जसअनुसार रास्वपाका उम्मेदवार खरेलले पाएको मत ४ दशमलब १४ प्रतिशत रहेकाले उनको जमानत जफत भएको हो ।
बारा–२ मा ३४ उम्मेदवारमध्ये तीन जनाले मात्र दस प्रतिशत मत कटाएका छन् । विजेता उपेन्द्र यादवसहित निकतटम् प्रतिस्पर्धीका रुपमा रहेका शिवचन्द्र प्रसाद कुशवाहा र एमालेका पुरुषोत्तम पौडेलले १० प्रतिशत मत कटाएका छन् । सत्ता गठबन्धनको उम्मेदवार यादवले २८ हजार ४१५, नागरिक उन्मुक्ति पार्टीका कुशवाहले २३ हजार ३३४ र एमालेका पौडेलले १० हजार २१६ मत प्राप्त गरेका छन् ।
बाँकी ३१ उम्मदवारको जमानत जफत भएको मुख्य निर्वाचन अधिकृत उपाध्यायले जानकारी दिएका छन् ।
प्रतिक्रिया दिनुहोस् !