हवल्दार महतोको असुली धन्दाको नयाँ काइदा, दर्जा हवल्दार तर परिचय इन्स्पेक्टर, डि.एस.पी.

जनकपुर (धनुषा), १२ वैशाख । संघीय प्रहरी कार्यालय जनकपुरमा कार्यरत एकजना प्रहरी हवल्दारले पैसा असुली गर्न नयाँ काइदा अपनाएका छन् । आफूलाई इन्स्पेक्टर भन्दै तस्कर र व्यापारीसँग पैसा असुल्ने गरेको पाइएको छ । लामो समयदेखि संघीय प्रहरी कार्यालयमा कार्यरत नेपाल प्रहरीका हवल्दार महेन्द्र प्रसाद महतो भन्ने ‘एम.पी. राज महतो’ ले आफूलाई प्रहरी इन्स्पेक्टर बताई तस्कर र व्यापारीहरुसँग पैसा असुल्ने गरेको पाइएको हो । सामाजिक सञ्जालदेखि साथीभाइहरुबीच एम.पी. राज महतोका नामले परिचय बनाएका हवल्दार महतोले जो कोही सामु आफूलाई इन्स्पेक्टरको रुपमा चिनाउने गरेका छन् भने हालै उनले आफूलाई डि.एस.पी. पनि भन्न भ्याएको बताइएको छ ।

धनुषा जिल्ला प्रहरी कार्यालयमा दरबन्दी भएपनि उनी लामो समयदेखि संघीय प्रहरी कार्यालय जनकपुरमा काजमा कार्यरत छन् । उनी तोकिएको ठाउँमा दरबन्दी रुचाउँदैनन्, उपल्लो दर्जाका प्रहरी अधिकृतको चाप्लुसी गरेकै भरमा उनले डि.एस.पी., इन्स्पेक्टर, सई, असई, कसैलाई कमाण्डर नै मान्दैनन् । तोकिएको ठाउँमा दरबन्दी जाँदा बर्दी लगाएर ड्युटी गर्नुपर्ने उनलाई डर छ । हवल्दारको वर्दी लगाए आफूलाई इन्स्पेक्टरको रुपमा परिचय बनाएको तस्कर, व्यापारीहरुले उनलाई चिनि हाल्ने डर पनि छ । आफू हवल्दार भएको तस्कर, व्यापारीहरुले थाहा पाएपछि असुली धन्धामा अवरोध हुन सक्ने डरले उनी हवल्दारको वर्दी नलगाउने गरेको उनकै कमाण्डर एक इन्स्पेक्टरले जानकारी दिए ।

उनका अनुसार जागिर जाड्ने तर बर्दी नलगाउने हवल्दार महतोले अडान् राख्दै आएका छन् । महतोले हवल्दारमा बढुवा भएदेखि प्रहरी वर्दी लगाएका छैनन् । प्रहरीका उपल्लो अधिकृतहरुसँग उठबस, फोटो खिचेर सामाजिक सञ्जालमा चिप्काउने, डि.आई.जि., ए.आई.जि.हरुलाई फोन गरेर देखाउने, तस्कर व्यापारीहरुलाई डि.आई.जी., ए.आई.जि.को नाम लिएर तर्साउने अनि पैसा असुल्ने उनको बानी नै छ । उत्तम सुवेदी धनुषाको एस.पी. हुँदा उनकै घुमुवा रहेका महतोको अवैध शारिरिक सम्बन्धको घटना बाहिरिएपछि महतो नुवाकोट तानिएका थिए । त्यस पश्चात पुनः प्रहरी हाकिमहरुलाई चाप्लुसी गरेर संघीय प्रहरी कार्यालयमा आउन भ्याए । विगत १० बर्षदेखि उनी संघीय प्रहरी कार्यालय जनकपुरमा बसेर वर्दी विना घुम्ने गरेका छन् ।

प्रहरीका ठूला हाकिमसँग उठबस रहेकै कारण सिपाही भएदेखि नै असई, सईहरुलाई सरुवा बढुवा गराइदिन्छु र काज मिलाई दिने भन्दै प्रहरी संगठनकै कर्मचारीहरुबाट पैसा असुल्ने काम गरेका छन् । खास गरि भर्खरै आई.जी.पी.बाट अवकाश पाएका धीरजप्रताप सिंह एवं ए.आई.जी.बाट अवकाश लिएका उत्तम सुवेदी लगायतका प्रहरीका उपल्लो हाकिमहरुसँग राम्रो सम्बन्ध रहेको भन्दै करोडौं पैसा असुलेका छन् । जनकपुरमा उनको ५ करोडको घर रहेको बताइएको छ । एउटा प्रहरी हवल्दारले ५ करोडको घर किन्नु र महिनौं पिच्छे लग्जरी गाडी परिवर्तन गरि गरि चढ्नुले पनि उनको असुली कतिसम्म छ भनेर सहजै अनुमान लगाउन सकिन्छ ।

अझ धिरज प्रताप सिंह आई.जि.पि. हुँदा उनको नाममा करोडौं रुपैया असुलेको प्रहरी श्रोतले जानकारी दिएको छ । हाकिमका नाममा पैसा उठाउने र केही पैसा हाकिमलाई दिने, त्यो भन्दा पनि कुनैपनि हाकिम आउँदा लग्जरी गाडी पठाउने, आफू उनको भक्त नै रहेको देखाउने कार्य गर्दै आएका छन् । उनी चढ्ने मोटरसाइकल पनि करिब ९ लाख पर्ने रायल ईन्फिल्ड हो । चार चक्के लग्जरी गाडी त उनी महिनौं पिच्छे फेरि फेरि चढ्ने गरेको उनी काम गरि सकेका कमाण्डर इन्स्पेक्टरको भनाई छ । हबल्दार जागिरले त्यो हैसियत कसरी सम्भव हुन्छ ? मूल घर सर्लाही भएपनि उनी जनकपुरको मुझेलियामा आलिशान तीन तले घरमा बस्ने गरेका छन् । तर त्यो घर खरिदको आर्थिक स्रोत के हो भन्ने जवाफ कसैसँग छैन् । हालसालै उनले काठमाडौंमा पनि घडेरी जोडेका छन् ।

यति मात्रै कहाँ हो, उनले आफ्नो प्रेमीलाई काठमाडौं स्थित एम.बि.बि.एस. अध्ययन गराई रहेको प्रहरी श्रोतले जानकारी दिएको छ । केही वर्ष अघि एकजना सईले आफ्नो बहिनीको बिहे महतोसँग गरेका थिए । त्यस पश्चात उनले आफ्नो पहुँच र पावरको दम्ब देखाउँदै उनको बहिनीलाई छाडेर अहिले प्रेमीमा खर्च गरि रहेका छन् । विवाहित महतोको प्रेम कहानी छुट्टै छ । उनीबाट ति सई पनि पीडित रहेको बताइएको छ । एम.बि.बि.एस. अध्यापनको लागि मात्रै नेपालमा कम्तिमा ६० लाख भन्दा बढि पैसाको आवश्यकता पर्छ, ति पैसा कहाँबाट आई रहेको सम्बन्धित प्रहरी कार्यालयले पनि खोजविन गरेको छैन । साधारण २ हजार रुपैया घुस लिएको पाए तत्कालै निलम्बन गरेर छानविन गर्ने प्रहरी कार्यालयका उपल्लो हाकिमको आशिर्वादले नै महतो करोडौं असुली गरेका छन् ।

उनले अहिले आफूलाई प्रदेश डि.आई.जि. घुमुवाका रुपमा परिचय दिदै आएका छन् । नयाँ डि.आई.जि.को घुमुवा आफू नै बस्ने तय पनि भएको भन्दै तस्करीको लाइन सेटिङ्ग गर्न असुली धन्दालाई तिब्रता दिएका छन् । डि.आई.जि. के, आई.जि.पि.को लागि पनि मधेशमा पैसा असुल्ने जिम्मा आफै रहेको भनेर आफूलाई ठूलै अधिकृत ठान्दै आएका छन् । असुलीकै लागि उनले अर्का हवल्दार सुरेन्द्र ठाकुरलाई काज दरबन्दी फिर्ता गराइसकेका छन् । ठाकुर रवाना लिएर रातमाटे गण हिँडेका छन् ।

गफ दिन माहिर महतोले मधेश प्रदेशमा वैध अवैध क्रसर उद्योग, जुवा, कपडा तस्करी देखि घरपालुवा जनावरहरुको तस्करीको लाइन मिलाईदिने भन्दै लाखौ रकम महिनावारी सेटिङ्ग गरेर असुली गर्दै आएका छन् । महोत्तरी, सर्लाही र धनुषामा सञ्चालन हुने ठूला जुवाखालबाट ठेक्कामा पैसा असुली पनि यिनै महतोले गर्ने गरेका छन् । गोरु तस्कर शम्भू सिंहदेखि महोत्तरीका ठूला क्रसर व्यवसायी विजय साह, बेतन शर्मासँग उनको पुरानो चिनजान छ । विजय साहसँग उनको सेयरमा व्यापार पनि रहेको बताइएको छ । सधंैं विजयको जनकपुर स्थित डिपोमा उनको आउजाउ छ । उनी प्रहरी कार्यालयमा कहिलेपनि भेट्दैनन्, सधै त्यही विजयको डिपोमा भेट हुन्छ । क्रसर व्यवसायी बेतन शर्माको सिराहा, महोत्तरी र धनुषा लगायतका स्थानमा थुप्रै अवैध क्रसर उद्योग निर्वाध चलिरहेको छ । त्यसको संरक्षणको जिम्मा महतोकै छ ।

यसबारे मधेश प्रदेश प्रहरी कार्यालयका प्रमुख प्रहरी नायब महानिरीक्षक जनक भट्टराईले ति हवल्दारलाई यहाँबाट दरबन्दी पठाइसकिएको जानकारी दिए । उनका अनुसार लामो समयदेखि यहाँ कार्यरत रहेको कारण उनलाई दरबन्दी पठाउन निर्देशन दिइएको बताए ।