कलैया (बारा), ११ वैशाख । बाराको उपचुनावमा झण्डै ६० प्रतिशत मत खसेको छ । बाराको उपचुनाव अत्यन्तै चासोका साथ हेरिएको छ । जसपाका अध्यक्ष सहित अन्य दलहरुले प्रतिष्ठाको लडाईको रुपमा उपचुनावलाई लिएपनि मतदाताले भने यसलाई खासै रुचाएको देखिएन् । बुथ कब्जादेखि विभिन्न विषयको चर्चाले बाराको माहोल कस्तो बन्यो त ?
अहिले तीन वटै निर्वाचन क्षेत्रमा मतपेटिका संकलन भइरहेको सम्बन्धित निर्वाचन अधिकृतको कार्यालयले जनाएका छ । मतपेटिका मतगणना स्थलसम्म पु-याएलगत्तै सर्वदलीय बैठक बसेर गतगणना सुरु गर्ने तयारी निर्वाचन आयोगको छ । बारा–२ मा भएको उपनिर्वाचनमा ६० प्रतिशत मतदान भएको अनुमान गरएको छ ।
निर्वाचन अधिकृतको कार्यालय बाराका अनुसार मतदान केन्द्रबाट प्राप्त प्रारम्भिक सूचना अनुसार ६० प्रतिशत मतदान भएको छ । जुन अघिल्लो निर्वाचन भन्दा कम हो । यस अघि मंसिर ४ मा भएको निर्वाचनमा ६४.४४ मत खसेको थियो । निर्वाचन अधिकृत मुकेश उपाध्यायले मतगणनाको सम्पूर्ण तयारी पूरा भइसकेको र मतपेटिका संकलन गरिसकेपछि यथाशक्य चाँडो मतगणना सुरु गरिने बताए।
निर्वाचन शान्तिपूर्ण ढंगले सम्पन्न भएको बाराका प्रमुख जिल्ला अधिकारीको भनाई छ । बाहिर आएजस्तो विषय नभएको भन्दै प्रजिअ नवराज सापकोटाले निर्वाचनमा कुनै अप्रिय घटना नघटेको दाबी गरे । बाराको देवताल गाउँपालिका ७ पिपरपाती जब्दी मतदान केन्द्रबाट जसपाका नेता रामसागर यादव नक्कली मतपत्रसहित पक्राउ परेका हुन । मतदान गर्ने बेला नक्कली मतपत्र समेत खसाल्दै गर्दा उनी पक्राउ परेका प्रहरीले जनाएको छ ।
त्यस्तै, जनमत पार्टीका अध्यक्ष सिके राउतले बारा २ का २ मतदान केन्द्रमा बुथ कब्जा भएको आरोप लगाएका थिए र एमालेका उमेद्वार पुरुषोत्तम पौडेलले पनि उपनिर्वाचनका क्रममा प्रहरी प्रशासन नै लागेर धाँधलीपूर्ण ढंगले मतदान गरेको भन्दै त्यस प्रकारका गतिविधि रोक्न माग गरेका थिए ।
उनले सामाजिक सञ्जाल फेसबुकमा स्टाटस लेख्दै भनेका छन ठाउँ ठाउँमा मतदाताहरु रोक्ने, ईनरवा, सनफुलवा, सिचाई वुथ लगायतका वुथहरुमा प्रहरीका सई र असइ नै गठवन्धनको पक्षमा मतदान गराउन लाग्ने गरेको भन्दै कब्जा गर्ने, एउटै व्यक्तिले दुईटा मत खसाउने जस्ता धाँधलीका रुपहरु नागो रुपमा देखिई रहेको बताएका छन् । तर यता मुख्य निर्वाचन अधिकृत मुकेश उपाध्यायका अनुसार यस्ता कार्य बाराका कुनै मतदान स्थलमा नभएको जनाएका छन् ।
सबै निर्वाचन क्षेत्रमा छिटपुट घटनाबाहेक शान्तिपूर्णरुपमा निर्वाचन सम्पन्न भएपछि अहिले मतपेटिकाको संकलन कार्य भइरहेको छ । मतपेटिका संकलन भएपछि मुचुल्का उठाउने र मतगणना केन्द्रमा मतपेटिका पुर्याइएपछि आजै रातिदेखि मतगणना कार्य सुरु गर्ने निर्वाचन आयोगले बताएको छ ।
प्रतिक्रिया दिनुहोस् !