स्ववियु निर्वाचनको लागि फर्जी मतदाता तयार गरिएको भन्दै ठाराब क्याम्पसमा आगजनी

वीरगंज (पर्सा), २६ फागुन / स्वतन्त्र विद्यार्थी युनियन निर्वाचनको विषयलाई लिएर विद्यार्थीहरुले वीरगंज स्थित ठाकुरराम बहुमुखी क्याम्पसमा आगजनी गरेका छन् । स्वतन्त्र विद्यार्थी युनियन निर्वाचनको लागि फर्जी मतदाता तयार गरेको भन्दै विद्यार्थीहरुले ठाकुरराम बहुमुखी क्याम्पसको विद्यार्थी कल्याण तथा खेलकुद शाखामा आगजनी गरेका हुन् ।
मतदाता नामावलीको विषयमा अखिल क्रान्तिकारी, अनेरास्ववियु, अनेस्ववियू, नेविसंघ, समाजवादी विद्यार्थी लगायतका नेताहरु क्याम्पस प्रमुख र निर्वाचन अधिकृतसँग विवाद गरिरहेका बेला केही विद्यार्थीले पेट्रोल छर्केर विद्यार्थी कल्याण तथा खेलकुद शाखामा आगो लगाएका थिए ।
आगलागीबाट फर्निचरका केही सामानहरु जलेको हो भने आगजनीमा संलग्न रहेको आशंकामा प्रहरीले ३ जना विद्यार्थी नेताहरुलाई पक्राउ गरेको हो । पक्राउ पर्नेमा विद्यार्थी नेता सुजित गिरी, मनिष चौहान तथा शिवम साह पक्राउ परेका छन् । क्याम्पसमा तनाव सृजना भएपछि जिल्ला प्रहरी कार्यालय पर्साबाट खटिएको प्रहरी टोलीले ३ जना विद्यार्थी नेतालाई पक्राउ गरेको जिल्ला प्रहरी कार्यालय पर्साले जनाएको छ ।
निर्वाचन समितिले २१ गते प्रकाशित गरेको १० हजार २ सय ३२ नामावली मध्ये ८ सय फर्जि मतदाता रहेको आरोप लगाउँदै विद्यार्थीहरुले क्याम्पस प्रमुख र निर्वाचन अधिृकतका विद्यार्थी नेतासँग विवाद गरेपछि विद्यार्थीहरुले क्याम्पसका आगजानी गरेको थियो । विवाद पश्चात विद्यार्थी कल्याण तथा खेलकुद शाखा प्रमुख रामविनय यादवले क्याम्पस प्रमुख उमेश चौरसिया समक्ष राजीनामा पत्र बुझाएका छन् ।