कलेजको बार्षिकोत्सवको अवसरमा रात्रि सांस्कृतिक तथा खाना मेला

वीरगंज (पर्सा), ४ फागुन / वीरगंज कलेजले १० औं वार्षिकोत्सवको अवसरमा रात्रि सांस्कृतिक तथा खाना मेला आयोजना गर्ने भएको छ । कलेज प्राङ्गणमा आयोजित पत्रकार सम्मेलनमा यही फागुन १२ र १३ गते घण्टाघरदेखि उत्तरतर्फ बी.पी. उद्यान छेउको फुटपाथमा अपरान्ह ३ बजेदेखि राति १० बजेसम्म मेला लाग्ने कलेजका अध्यक्ष डा. दीपेन्द्र कुमार चौधरीले जानकारी दिए ।
उनका अनुसार विद्यार्थीमा ‘सिक्दै जाऔं कमाउँदै जाऔं’ भन्ने अवधारणाको विकास गर्न, वीरगंज महानगरपालिकाले ल्याएको रात्रि बजारको अवधारणालाई सघाउन, नेपाल सरकारको स्टार्टअपको अवधारणालाई साकार पार्नुको साथै बारा पर्साको लोक संस्कृति तथा परम्परागत खानाको प्रवद्र्धन गर्न मेलाको आयोजना गर्न लागिएको बताए । ‘डिग्री बाँडेर मात्रै हुँदैन, विद्यार्थीले कलेज जीवन पछि पनि केही गर्न सक्ने हुनुपर्छ’ भन्दै अध्यक्ष चौधरीले ‘स्टार्टअप मात्रै भन्दा विद्यार्थीले बुझ्दैनन्, भुजा पकौडी बेचेर पैसा कमाउन थालेपछि बल्ल जान्दछन्, त्यसैले विद्यार्थीले नै स्टल लगाउने गरि मेलाको आयोजना गर्न लागिएको बताए ।
मेलामा स्थानीय परिकार घोंगी, भुजा पकौडी लगायत २१ प्रकारका खाना तथा झिंझिया, माघी नाच लगायत सांस्कृतिक प्रदर्शनी राखिएको बताइएको छ । ८ लाख रुपैयाँ खर्च हुने अनुमान गरिएको मेला आयोजनाका लागि महानगरले २ लाख रुपैयाँ सहयोग गर्ने तय भएको छ भने अन्य खर्च कलेजको अतिरिक्त क्रियाकलाप कोष, प्रायोजक तथा सह प्रायोजकहरुबाट संकलन गरिने अध्यक्ष चौधरीको भनाई छ ।
मेलामा २५ वटा स्टल रहनेछन् । स्टलमा विद्यार्थी समूहले विभिन्न परिकारका स्वादिलो खाना बिक्री वितरणका लागि राख्ने छन् । त्यसबाट प्राप्त हुने आम्दानी विद्यार्थीको नै हुने कलेजको भनाई छ । स्टलका लागि कलेजले विद्यार्थीसँग कुनै शुल्क लिइने छैन । मेलामा स्वादिलो खानाका परिकारसँगै भोजपुरी प्रख्यात गायक सुनिल पण्डित, कलेजको विद्यार्थी तथा पूर्व विद्यार्थीको सांस्कृतिक प्रस्तुति रहने कलेजले जनाएको छ ।