बरियारपुर (बारा), १ फागुन / बारा जिल्लाको बरियारपुर स्थित क्याम्पस भवन निर्माणको निम्ति श्रीमद् भागवत सप्ताह एवं गढीमाई धार्मिक महोत्सवको आयोजना हुने भएको छ । महानगढीमाई नगरपालिका वडा नं. १ बरियारपुर स्थित श्री गढीमाई बहुमुखी क्याम्पसको लागि जग्गा खरिद र भवन निर्माण गर्ने उद्देश्यले यही फागुन २ गतेदेखि ९ गते एक हप्तासम्म आयोजना हुन लागेको हो ।
महानगढीमाई नगरपालिकाका नगर प्रमुख उपेन्द्र यादवले पत्रकार सम्मेलन गरि क्याम्पस अभावमा यस क्षेत्रका विद्यार्थीहरुलाई कलैया, वीरगंज, हेटौडा, काठमाडौं लगायतका स्थानहरुमा जानुपर्ने बाध्यतालाई मध्यनजर गर्दै यहाँ रहेको क्याम्पस भवनलाई स्तरोन्नति गर्न चाहिने खर्च जुटाउने उद्देश्यले श्रीमद् भागवत सप्ताह एवं गढीमाई धार्मिक महोत्सवको आयोजना गर्न लागिएको बताए । उनले महोत्सवबाट करिब ५ करोड भन्दा बढि चन्दा संकलन गर्ने लक्ष्य रहेको बताए । महोत्सवबाट संकलित चन्दाले क्याम्पसको लागि २ विगहा जग्गा खरिद गर्ने एवं भवन निर्माण गर्ने लक्ष्य रहेको उनको भनाई छ ।
महोत्सव शुरुको दिन फागुन २ गते कलश यात्रा निकालिने कार्यक्रम रहेको नगर प्रमुख यादवले जानकारी दिए । बारा जिल्लाको प्रसिद्ध धार्मिक स्थल श्री गढीमाई मन्दिर नजिकै आयोजना हुन लागेको श्रीमद् भागवत सप्ताह एवं गढीमाई धार्मिक महोत्सवको फागुन २ गते बिहान ७ बजे महागढीमाई मन्दिरको प्राङ्गणबाट निकालिने कार्यक्रम तय भएको जानकारी दिए । मन्दिर प्राङ्गणबाट निकालिने कलश यात्रा भटीपुल, साहुटोल, गणेश चौक, मैनी टोल हँुदै थलही नदीबाट कलशमा जल भरि बरियारपुर चौक भन्सिया टोल, बरियारपुर बजार, गायत्री चौक, संसारी माई मंन्दिर हुँदै गढीमाई नजिक महोत्सव स्थलसम्म पुगि समापन हुने नगर प्रमुख यादवले जानकारी दिए ।
उनका अनुसार महोत्सवमा आकर्षणका लागि विभिन्न किसिमका मुर्ति, प्रबचन, झुला लगायत विभिन्न मनोरञ्जनात्मक बस्तुहरु आउने बताए । क्याम्पस भवन निर्माणको लागि आयोजना हुन लागेको धार्मिक महोत्सव उद्घाटन गर्न मधेश प्रदेशका मुख्यमन्त्री सरोज यादव आउने कार्यक्रम तय भएको यादवको भनाई छ । पत्रकार सम्मेलनमा श्री गढीमाई बहुमुखी क्याम्पसका अध्यक्ष बिजय स्वर्णकार, जितेन्द्र गुप्ता, कैलास मुखिया, महेश जयसवाल, बिरेन्द्र यादव, धबेन्द्र यादव लगायतको उपस्थित रहेको थियो ।
प्रतिक्रिया दिनुहोस् !