वीरगंज (पर्सा), २९ माघ / दोहरो नागरिकको आरोप लागेका वीरगंज महानगरपालिका वडा नं. ९ निवासी बच्चा साह सोनार भन्ने रामनरेश साह सोनारको छोरा लागु औषध सहित पक्राउ गरेका छन् । भारतको रक्सौलबाट लागुऔषध बोकी वीरगंजतर्फ आइरहेका सर्राफका छोरा सुनिल कुमार सर्राफलाई पर्सा प्रहरीले २१ थान नाइट्रोभेट ट्याब्लेट लागुऔषध सहित पक्राउ गरेको हो ।
यही माघ २९ गते करिब २ बजेको समयमा नियमित चेकजाँचको क्रममा इलाका प्रहरी कार्यालय इनर्वाबाट खटेको प्रहरी टोलीले नेपाल भारत सिमा क्षेत्र वीरगंज भन्सार स्थित शंकराचार्य गेट नजिकैबाट सर्राफलाई पक्राउ गरेको हो ।
लागुऔषध सहित पक्राउ परेका सर्राफलाई इनर्वा प्रहरी चौकीले आवश्यक कारवाहीको लागि वीर्ता स्थित वडा प्रहरी कार्यालय पर्सामा पठाएको थियो भने वडा प्रहरी कार्यालय वीर्ताले जिल्ला प्रहरी कार्यालय पर्सामा सर्राफलाई पठाइसकेको बताइएको छ ।
लागुऔषध सहित पक्राउ परेका सर्राफमाथि आवश्यक अनुसन्धान भइरहेको जिल्ला प्रहरी कार्यालय पर्साका प्रहरी नायब उपरीक्षक दिपक गिरीले जानकारी दिए । उनका अनुसार शनिबार पक्राउ परेका सर्राफलाई शनिबारको दिन सार्वजनिक विदा भएकोले मुद्दा नचलाइएकोले आइतबारको दिन आवश्यक अनुसन्धान भइरहेको र साँझसम्म सम्मानित जिल्ला अदालतबाट म्याद थप गराई आवश्यक अनुसन्धान प्रक्रिया अगाडि बढाइने जानकारी दिए ।
पक्राउ परेका सुनिल सर्राफको बुवा बच्चा सोनार भन्ने रामनरेश साह सोनार माथि केही महिना अगाडि मात्रै दोहरो नागरिकताको आरोप लागेको थियो । उनले सम्मपुर्ण परिवारले झुठो विवरण पेशगरि नेपाली नागरिकता प्राप्त गरेको विषयमा जिल्ला प्रशासन कार्यालय पर्सामा उजुरी दर्ता भएको थियो । उनको नागरिकता छानबिनको लागि मिति २०७८/०७/०१ गते दर्ता नं. ४५१ मा निवेदन समेत दर्ता भएको थियो । त्यस पश्चात जिल्ला प्रसाशन कार्यालय पर्साले नागरिकता खारेजीको लागि गृहमन्त्रालयलाई दर्ता नं. ३०३ ले पत्राचार गरेको थियो ।
उनी विरुद्ध नागरिकता मात्रै नभई विभिन्न अवैध कार्य गरि अकुत सम्पत्ति कमाएको आरोप पनि लागेको थियो । उनीमाथि अवैध तरिकाले सम्पत्ति आर्जन गरेको आरोप लागि सम्पत्ति छानबिनको लागि सम्पत्ति शुद्धिकरण बिभागको कार्यालय ललितपुरमा समेत २०७८/०८/२० गते दर्ता नं. २३४० मा निवेदन दर्ता भएको थियो तर हालसम्म यिनी पैसाको बलमा उम्किदै आएका छन् ।
प्रतिक्रिया दिनुहोस् !