वीरगंजलाई पर्यटकीय नगरीको रुपमा विकास गर्न महानगर लागि परेको छ : मेयर सिंह

वीरगंज (पर्सा), २३ माघ / वीरगंज (पर्सा), २३ माघ ।
वीरगंज महानगरपालिकाका प्रमुख राजेशमान सिंहले वीरगंजलाई पर्यटकीय नगरीको रुपमा विकास गर्न महानगर लागि परेको बताएका छन् । होटल तथा पर्यटन व्यवसायी संघ वीरगंज तथा पर्यटक प्रहरी कार्यालय भृकुटीमण्डपद्वारा वीरगंजमा आयोजित ‘पर्यटन प्रवद्र्धन तथा पर्यटन सुरक्षामा सरोकारवाला निकायहरुको भूमिका’ विषयक कार्यक्रमलाई सम्बोधन गर्दै नगर प्रमुख सिंहले सो कुरा बताएका हुन् ।
उनले भारतीय पर्यटक भित्र्याउने गरि महानगरले काम गरिरहेको भन्दै त्यसमा सबैले साथ र सहयोगको आवश्यक्ता रहेको बताए । वीरगंजमा धेरै आउने भनेको भारतीय पर्यटक नै हो, यहाँका पर्यटन व्यवसायी पनि भारतीय पर्यटकको पर्खाइमै रहेका हुन्छन्, त्यसैले हामीले पनि भारतीय पर्यटक बढि भित्र्याउन विभिन्न कार्यहरु गर्दै आएको बताए । उनले विगतमा भारतीय सवारी साधनहरुसँग विभिन्न करको नाममा कर उठाइने कार्यलाई बन्द गरिएको भन्दै भारतीय गाडीहरुसँग गरिने व्यवहारमा पनि परिवर्तन भएको उनको भनाई छ । पहिलो भारतीय नम्बरको गाडी हेर्ने वित्तिकै ट्राफिक प्रहरीदेखि प्रहरी प्रशासन तथा अन्य व्यक्तिहरु पनि नराम्रो व्यवहार गर्ने गरेको अवस्थामा अहिले भारतीय पर्यटकहरुलाई यहाँका नागरिकदेखि प्रहरी प्रशासनले हेर्ने दृष्टिकोण परिवर्तन भएको बताए ।
भारतीय सवारी सँग लिने गरिएको कर हटाउँदा महानगरको वार्षिक ६ करोड आम्दानी गुमेको भएपनि भारतीय पर्यटकको आगमनले पर्यटनसँग आश्रित व्यवसायी र परिवारको घर चल्न ठूलो मद्दत मिलेको उनको भनाई छ । महानगरले माइस्थान मन्दिर सौन्दर्यकरण गरेर धार्मिक पर्यटनको मार्ग खुलाउन खोजेको भन्दै उनले अब १५० वर्ष भन्दा बढि पुरानो नृसिंह पिपरा मठको पुनः निर्माणमा आफूहरु लागि परेको बताए । आउँदो चैतसम्ममा वीरगंजको मुहार फेर्ने गरि महानगरपालिकाले काम गरिरहेको भन्दै त्यसका लागि सबैको साथ र सहयोगको आवश्यकता रहेको बताए । सबैले आफ्नो ठाउँबाट काम गरे मात्रै वीरगंजलाई आर्थिक नगरीसँगै पर्यटकीय नगरीको रुपमा विकास गर्न सकिने कुरामा जोड दिए ।
कार्यक्रममा जिल्ला प्रशासन कार्यालय पर्साका सहायक प्रमुख जिल्ला अधिकारी भिमकान्त पौडेल, ससस्त्र प्रहरी उपरीक्षक सुमन थपलिया, जिल्ला प्रहरी कार्यालय पर्साका प्रहरी नायव उपरीक्षक निर्मल बुढाथोकी, नेपाल पत्रकार महासंघका केन्द्रीय सचिव दिपेन्द्र चौहान लगायत होटल व्यवसायी तथा सुरक्षा निकायका पदाधिकारीहरुको उपस्थिति रहेको थियो ।