पिपरा सडकलाई महात्मा गान्धी नामाकरण गर्ने विषय हालका लागि स्थगित

• मुस्कान श्रेष्ठ
वीरगंज (पर्सा), १८ माघ / स्थानीयको व्यापक विरोध पछि वीरगञ्ज महानगरपालिका वडा नम्बर १४ पिपरा लिङ्क रोडको नामाकरण तथा अनावरण कार्यक्रम स्थगीत भएको छ ।
वीरगञ्ज महानगरपालिकाले ऐतिहासिक महत्व बाकेको वडा नम्बर १४ पिपरा लिङ्क रोडलाई महात्मा गान्धी पथ नामाकरण गर्नका लागेकोमा सर्वत्र विरोध भएपछि भोली बिहीबार हुने उद्घाटन कार्यक्रम स्थगित भएको हो ।
महानगरपालिकाले आज एक सूचना जारी गर्दै कार्यक्रम स्थगीत भएको जानकारी गराएको हो । वीरगञ्ज महानगरपालिका वडा नम्बर १४ पिपरा लिङ्क रोडलाई महात्मा गान्धी नामाकरण गर्नका लागि बिहीबार मधेश प्रदेशका मुख्यमन्त्री सरोज कुमार यादव र नेपालका लागि भारतीय राजदुत नवीन श्रीवास्तवले संयुक्त रुपमा अनावरण गर्ने कार्यक्रम तय भएको थियो । तर स्थानीय स्तरमा विरोध भएपछि भारतीय राजदुत नआउने भएपछि हालका लागि उक्त कार्यक्रम स्थगीत गरिएको जनाएको छ ।
वीरगञ्ज १४ स्थित पिपराको आफ्नै धार्मीक, ऐतिहासिक तथा सांसकृतिक महत्व रहेको छ । त्यसलाई समाप्त गर्ने चलखेल भईरहेको भन्दै स्थानीय युवादेखि बद्धिजिवी तथा विभिन्न राजनीतिक दलका नेताहरुले विरोध गरेका थिए । साथै महानगरपालिकाले सो आफ्नो निर्णय फिर्ता नलिए कडा विरोध गर्ने चेतावनी दिएका थिए ।
यता वीरगञ्ज महानगरपालिकाका मेयर राजेशमान सिंहले सडक अनावरण कार्यक्रमलाई दुष्प्रचार गरेर विवादीत बनाउन खोजिएपछि नेपालका लागि भारतीय राजदुत जस्तो व्यक्तित्वलाई बोलाएर विवादीत बनाउन उपयुक्त नभएकोले कार्यक्रम स्थगीत गर्नुपरेको बताए । उनले यसबारेमा परामर्श गरेर उक्त कार्यक्रम आयोजना गर्ने जानकारी दिए ।