काठमाडौं, १७ माघ / रास्वपाका सभापति रवि लामिछानेले प्रधानमन्त्री पुष्पकमल दाहाल प्रचण्डलाई भेटेर गृह मन्त्रालय आफूलाई नै दिन माग गरेका छन् । आज बिहान प्रधानमन्त्री निवास, बालुवाटारमै पुगेर लामिछानेले उपप्रधान तथा गृहमन्त्रीमा नियुक्ति नगरेमा तत्कालै सरकार छाड्ने बताएका हुन् ।
नागरिकता अवैध रहेको भन्दै सर्वोच्च अदालतले लामिछानेको उपप्रधानमन्त्री र गृहमन्त्री तथा सांसद पद गुमाएका लामिछानेले पुनँ नागरिकता वैध बनाएसँगै गृहमन्त्रीमा दाबी गरेका हुन् ।
लामिछानेको उक्त मागबारे प्रधानमन्त्री प्रचण्डले सल्लाह गरेर जवाफ दिने बताएका थिए । आज बेलुकासम्म प्रधानमन्त्रीबाट सकारात्मक जवाफ नआएमा आजै बेलुकी पत्रकार सम्मेलन गरेर सरकारबाट फिर्ता भएको घोषणा गर्ने रास्वपाका नेताहरुको भनाइ छ ।
सत्ताघटक दल नेकपा एमालेका अध्यक्ष केपी ओलीले समेत गृह मन्त्रालयमा रविलाई नै पुनः नियुक्त गर्न दबाब दिइरहेका छन् । तर प्रधानमन्त्री प्रचण्ड भने गृहमन्त्रीमा कसलाई दिने भन्नेमा अलमलमै रहेको बताइएको छ ।
गृहमन्त्री रास्वपाले पाइसकेको विषय रहेको भन्दै पुनः आफ्नै पार्टीले पाउनुपर्ने रास्वपाको निर्णय छ । गृहमन्त्री पाए पनि व्यक्ति चाहिँ रविलाई नै पठाउने कि या कसलाई पठाउने भन्नेबारे रास्वपाले तय गरिसकेको छैन । संविधान अनुसार सांसद नरहे पनि ६ महिनासम्म गैरसांसदलाई मन्त्री बनाउन सकिन्छ ।
प्रतिक्रिया दिनुहोस् !