पोखरिया र वीरगंजमा बलिदानी दिवस मनाइयो

वीरगंज (पर्सा), ५ माघ / मधेस आन्दोलनका शहिदहरुको सम्झनामा मनाइने बलिदानी दिवस बिहीबार पर्साको पोखरियामा पनि मनाइएको छ ।पोखरीया बजार स्थित शहिद चन्दन पटेलको शालीकमा फुलमाला अर्पण गरि बलिदानी दिवस मनाइएको हो । जनता समाजवादी पार्टी (जसपा)) को पोखरिया नगर समितिले श्रद्धाञ्जली सभाको आयोजना गरि बलिदानी दिवस मनाएको जसपा पोखरिया नगर समितिका अध्यक्ष राजु साहले जानकारी दिए ।
श्रद्धान्जलीसभामा बोल्दै वक्ताहरुले मधेस आन्दोलन र मधेसी शहिदको बलिदानीबाट नै संघीयता, समावेशीता जस्ता राजनीतिक उपलब्धिहरु प्राप्त भएकाले शहिदको त्याग र आहूतीलाई भुल्न नहुनेमा जोड दिए । कार्यक्रममा जसपाकी केन्द्रिय सदस्य नेतृ सल्मा खातनु, जसपाका केन्द्रीय सल्लाहकार खलील मिया, शहिद चन्दन पटेलका काका मनोज पटेल, जसपाका क्षेत्रीय अध्यक्ष पवन कुमार सिंह, नेतृ डा.मधु गुप्ता, मुख्तार मियाँ, हरिन्द्र साह, देवेन्द्र साह, जग मुखिया लगायतका नेता कार्यकर्ताको पनि सहभागीता थियो ।
बलिदानी दिवसमा बिहिबार मधेस प्रदेश सरकारले प्रदेशमा सार्वजनिक विदा समेत दिएको छ । यसैगरी वीरगंजमा पनि बलिदानी दिवस मनाइएको छ । बलिदानी दिवसको अवसरमा वीरगंजको घण्टाघर चोक नजिकैको मधेसी सहिद पार्कमा बिहिबार जनता समाजवादी पार्टी (जसपा) पर्साका नेता तथा कार्यकर्ताले शहिदका शालिकमा फुलमाला चढाएर श्रद्धाञ्जली अर्पण गरेका हुन् । त्यस क्रममा उनिहरुले मधेस आन्दोलन र मधेसी शहिदहरुकै त्याग र बलिदानीका कारण मधेसीले पहिचान, संघीयता, समावेशीता लगायतका अधिकार पाउन सफल भएको बताए । अझै पनि मधेस आन्दोलनका केही मुद्दा सम्बोधन हुन बाँकी नै रहेको भन्दै जसपाका नेताहरूले त्यसका लागि आफुहरुको संघर्ष जारी नै रहेको जिकिर गरे ।
जसपा पर्साका अध्यक्ष रामनरेश प्रसाद यादवको अध्यक्षता तथा प्रदेशसभा सदस्य प्रमोद जयसवालको प्रमुख आतिथ्यतामा भएको कार्यक्रममा जसपाका केन्द्रिय सदस्य फिरोज मन्सुर, केन्द्रिय परिषद सदस्य शिवजी सोनी, जसपा मधेस प्रदेश उपाध्यक्ष बृजमोहन तिवारी, जिल्ला सचिव तबरेज अहमद, युवा नेता सरोज यादव, अमित यादव, सफ्रोज आलम, विद्यार्थी नेताहरु एजाजबाबु रान्की, हरेन्द्र साह, सागिर आलम, नैमोदिन आलम, फरिद आलम, आबिद समानी लगमयतको सहभागीता थियो ।