• विसुनदेव सरदार
सिरहा (लहान), २९ पुस / सिरहा जिल्लाको लहान नगरपालिका स्थित बालबिटौरी तथा गाउँ ब्लक जग्गा फुकुवा संघर्ष समितिले आन्दोलन गर्ने चेतावनी दिएको छ । विगत लामो समयदेखि बन्द रहेको बाल विटौरी तथा गाउँ ब्लक जग्गा रोक्कालाई यही माघ ३ गतेसम्म फुकुवा नगरे चरणबन्द आन्दोलन गर्ने चेतावनी दिएको हो । संघर्ष समितिद्वारा आयोजित पत्रकार सम्मेलनमा बोल्दै अध्यक्ष विजय कुमार महतोले बाल विटौरी तथा गाउँ ब्लक जग्गा फुकुवा गर्नका लागि संघर्ष समितिले पटक पटक ध्यानाकर्षण गराउनुको साथै विरोध गर्दै आएपनि हालसम्म फुकुवा हुन नसकेकोले यही माघ ३ गतेसम्म गाउँ ब्लक जग्गा फुकुवा नभए चरणबन्द आन्दोलनमा उत्रने चेतावनी दिएका छन् ।
सिराहा लगायत अधिकाँश जिल्लामा गाउँ ब्लक जग्गा रोक्काको समस्या रहेको छ । यसको प्रमुख कारक स्थानीय तहहरु, भुमि सुधार मन्त्रालय, नापी, मालपोत कार्यालयका कर्मचारीको ढिलासुस्ती हो । लहान नगरकार्यपालिकाको कार्यालयले आउँदो माघ ३ गतेसम्म कार्य सम्पादन गर्ने तयारीमा जुटि सकेको अवस्थामा यस समस्यालाई पनि समाधान गरिने प्रमुख प्रशासकीय अधिकृत सत्रुधन प्रसाद चौधरीले आश्वासन दिएको पत्रकार सम्मेलनमा बताइयो ।
पत्रकार सम्मेलनमा रोक्का जग्गा फुकुवाका लागि पटक–पटक मन्त्रालयमा पहल गर्दा नगरपालिका कार्यालय र नापी कार्यालयलाई संयुक्त रुपमा जग्गाको वर्ग तथा पुरानो कित्ता नम्बर मिलान गरि पठाउने गरि मालपोतको मध्स्था हुनेगरि निर्देशन दिनुका साथै वि.स. २०२९ बैशाख ०७ गते तत्कालीन लहान नगर पञ्चायद्वारा लहानका विशिष्ट श्रेणीका गाउँ–ब्लक मध्ये ३३ कित्ता जग्गामा मात्रमा बढी कर मालपोत उठाउन शिर्षक परिवर्तन गरि बालबिटौरी कर उठाउने गरि श्रेष्ता राख्ने निर्णय सुरक्षित रहेको अध्यक्ष महतोले बताए ।
हाल ३३ कित्ता नभई ६०० भन्दा बढी कित्तामा नगरपालिकाले गाउँ ब्लकको जग्गालाई पनि बालबिटौरी भनि कर संकलन गर्दै आएको भन्दै अध्यक्ष महतोले नापी कार्यालयद्वारा सबै जग्गा गाउँब्लकको नाममा नाप जाँच पहिचान गरि अधिकाँश जग्गा धनीलाई लालपुर्जा (जग्गा धनी प्रमाणपत्र) वितरण गर्नुपर्ने माग गरे । नगरपालिका र नापी कार्यालयको कर्मचारीहरुको कमिकमजोरी तथा उदाशिनताका कारणले हालसम्म बालबिटौरी तथा गाउँ–ब्लक जग्गा फुकुवा हुन् नसकेको जग्गा फुकुवा संघर्ष समितिको आरोप छ ।
यता, लहान नगरपालिकाका प्रमुख प्रशासकीय अधिकृत महेश प्रसाद चौधरीले छिट्टै यस नगरपालिका स्तर र व्यक्तिगत स्तरवाट जग्गा फकुवाका लागि प्रयास गरिने बताए । जग्गा फुकुवाको लागि हामी संघर्ष समितिसँग सहकार्य गरि अघि बढ्ने उनको भनाई छ ।
प्रतिक्रिया दिनुहोस् !