प्रथम आएको रिसमा आफ्नै साथीको अपहरण गर्ने ४ विधार्थी पक्राउ

• मुस्कान श्रेष्ठ
वीरगंज (पर्सा), २४ पुस / वीरगंजमा आफ्नै साथीलाई अपहरण गरी शरीर बन्धक बनाउने अभियोगमा कक्षा १० मा अध्ययनरत ४ विधार्थीलाई पर्सा प्रहरीले पक्राउ गरेको छ । वीरगंजको एक सामूदायीक विधालयको कक्षा १० मा अध्ययनरत नाम नखुलेको बालकलाई शनिबार बिहान आफ्नै घर आँगनबाट सोही कक्षामा अध्ययन गर्ने चार जना विधार्थीले अपहरण गरी शरीर बन्धक बनाएको जिल्ला प्रहरी कार्यालय पर्साले जनाएको छ ।
वीरगंज महानगरपानलिका वडा नम्बर १६ निवासी १६ वर्षीय बालक हराएको भन्दै परिवारजनले प्रहरीलाई खबर गरेका थिए । प्रहरीले खोजतलास गर्ने क्रममा बालकको मुखमा कपडा कोचेर कालो तारले दुवै हातखुट्टा बाँधेको अवस्थामा घरआगनबाट करिब ३ सय मिटर टाढा सुनसान चौरमा फेला परेको पर्साका प्रहरी नायब उपरीक्षक दिपक गिरीले जानकारी दिए । प्रहरीले घटनास्थलबाट रूमाल, केवलको कालो तारका टुक्राहरू, पञ्जा, गलबन्दी र कम्बल बरामद गरेका थिए ।
घटनाको अनुसन्धान गर्ने क्रममा उक्त बालक मेहेनती रहेको र कक्षामा सधै प्रथम आउने भएको हुँदा रिस र डाहको कारण केही बिद्यार्थीले आफ्नै साथीको अपहरण गर्न पुगेको प्रहरी प्रवक्ता गिरीले बताए । घटनामा संलग्न ४ जना विरुद्ध पर्सा जिल्ला अदालतबाट अपहरण तथा शरीर बन्धक कसूरमा ६ दिनको म्याद थप अनुमति प्राप्त भई अनुसन्धान भइरहेको बताए ।