नयाँ वर्षमा नेपाल आउने भारतीय पर्यटकहरुको संख्यामा वृद्धि, गाडी भन्सार गराउन घुइँचो

वीरगंज (पर्सा), १७ पुस / अन्तर्राष्ट्रिय नयाँ वर्ष २०२३ मनाउन नेपाल आउने भारतीय पर्यटकहरुको भीड लागेको छ । यही आइतबार परेको नयाँ वर्ष २०२३ को उपलक्ष्यमा नयाँ वर्ष मनाउन भारतीय पर्यटकहरु नेपाली शहरमा प्रवेश गर्नेहरुको संख्यामा वृद्धि भएको छ ।
नयाँ वर्षको एक दिन अगावैदेखि भारतीय पर्यटकहरुले नेपाल प्रवेश गर्न आफ्ना सवारी भन्सार गराउन लाम लागेको अवस्था देखियो । शनिबार र आइतबार नेपाल प्रवेश गर्ने भारतीय पर्यटकहरुको घुइँचो नै छ । नेपाल भारत सीमा क्षेत्रमा पर्ने वीरगंज रक्सौल सीमामा भारतीय गाडीहरु प्रवेश गर्नेहरुको लर्को लागेको छ । नेपाल भारतको मुख्य प्रवेशद्वार पनि वीरगंज रक्सौल नाका नै भएको कारण नेपालको विभिन्न शहरमा यही नाकाबाट भारतीय पर्यटकहरु प्रवेश गर्ने गरेका छन् ।
खास गरेर नयाँ वर्षको अवसरमा सिमा क्षेत्रमा पर्ने पर्सा जिल्लाको ठोरी, मकवानपुर जिल्लाको हेटौडा, चितवन जिल्लाको सौराहा, कास्की जिल्लाको पोखरा, काठमाडौं लगायतका स्थानमा जाने भारतीय पर्यटकहरुको घुइँचो लागेको छ । प्राकृत्तिक सौन्दर्यले भरिभराउ नेपालको विभिन्न सहर भारतीय पर्यटकहरु मन पराउने गरेको कारण पनि नयाँ वर्षको अवसरमा रमाइलो गर्न नेपालको विभिन्न सहर प्रवेश गर्ने गरेको स्थानीयहरुको भनाई छ । नयाँ वर्षको अवसरमा भारतीय प्रवेश गर्नेहरुको घुइँचो नै लाग्ने गरेको उनको भनाई छ ।
चितवन, पोखरामा रमाइलो हुने ठाउँ भएको कारण पनि आफूहरु प्रत्येक वर्ष नयाँ वर्ष मनाउन नेपाल प्रवेश गर्ने गरेको भारतीय पर्यटकहरुको भनाई छ । मोतिहारी निवासी भारतीय पर्यटकले नेपालको पोखरा, चितवन लगायतका स्थानमा सौन्दर्य पहाड, प्राकृत्तिक सौन्दर्यता, मनोकामना मन्दिर, पशुपतिनाथ लगायतका स्थानहरुमा घुम्न मन पराउने गरेको कारण वर्षको दुई तीन पटक विदा मिलाएर रमाइलो गर्न नेपाल प्रवेश गर्ने गरेको बताउँछन् ।
यस वीरगंज रक्सौल नाकाबाट नेपाल प्रवेश गर्ने भारतीय पर्यटकहरु खास गरेर चितवन, पोखरा प्रवेश गर्ने गरेका छन् । आफ्नो मुलुकमा धुलो बाहेक अन्य केही प्राकृत्तिक सम्पदाहरु नभएको कारण परिवार सहित नयाँ वर्ष मनाउन नेपाल प्रवेश गरेको बताउँछन् । ५ दिनको विदा लिएर परिवार सहित चितवन, पोखरा हुँदै काठमाडौं जाने योजना रहेको छ, वर्षमा एक पटक भएपनि परिवार सहित सुन्दर, शान्त वातावरणमा एक हप्ता भएपनि समय खर्च गर्ने योजना सहित नै भारतबाट नेपाल प्रवेश गरेको उनीहरुको भनाई छ ।
केही वर्षदेखि नयाँ वर्ष मनाउन भारतीय पर्यटकहरु नेपाल प्रवेश गर्नेहरुको संख्यामा वृद्धि भएको छ । विगतमा भारतीय पर्यटकहरुलाई हेर्ने दृष्टिकोणमा फरक भएपछि नेपाल प्रवेश गर्नेहरुको संख्यामा वृद्धि भएको हो । विगतमा हेटौडा प्रवेश गर्ने वित्तिकै विभिन्न बहानामा गाडी चेकजाँच, दुःख दिने कामहरु हुने गरेकोले भारतीय पर्यटकहरुको संख्यामा कमि भएपनि गत दुई तीन वर्षदेखि नेपाल प्रवेश गर्ने भारतीय पर्यटकहरुको संख्यामा वृद्धि भएको हो ।