जथाभावी पार्किङ र फुटपाथ अतिक्रमण धमाधम खाली गराइँदै

वीरगंज (पर्सा), ५ पुस / वीरगंज महानगरपालिकाले जथाभावी पार्किङ्ग गरि राख्ने तथा फुटपाथ अतिक्रमण हटाउने अभियानलाई तिब्रता दिएको छ । मंगलबार महानगरको टोलीले वीरगंजको बाइपास सडक छेउमा लामो समयदेखि पार्किङ गरेर छाडेको बेवारिसे ट्रक र सडक पेटीमा राखेका निर्माण सामग्री हटाएको छ ।
अव्यवस्थित पार्किङ्गलाई न्यूनीकरण गर्न तथा फुटपाथ अतिक्रमण खाली गराउने अभियान अन्तर्गत बाइपास सडकमा लामो समयदेखी वेवारिसे रुपमा छाडेको ना ३ ख ९२९५ नम्वरको ट्रक हटाएको हो । वडा नम्वर १५ लक्षमनवा स्थित बाइपास सडक छेउमा पार्किङ गरेर राखेको वेवारिसे ट्रकलाई महानगरपालिकाले नियन्त्रणमा लिएर अहिले बालमन्दिरको चौरमा राखेको छ ।
यसैबीच अभियानकै क्रममा सडक पेटीमा राखिएका निर्माण सामग्री हटाउनुका साथै फुटपाथमा राखिएका ठेला तथा पसल हटाइएको वीरगंज महानगरपालिकाका सरसफाई प्रमुख सरफुद्धिन मियाँले जानकारी दिए । सडक छेउ, फुटपाथ र नालामाथि जथाभावी निर्माण सामग्री तथा ठेला राखेर व्यवसाय गर्दा तथा सवारी पार्किङ गर्दा पैदल हिँड्न र सवारी दुर्घटनासमेत हुन सक्ने देखिएकाले महानगरले त्यसलाई हटाउन थालेको हो ।