रेशम चौधरीको रिहाइ माग गर्दै कलैयामा खबरदारीसभा

कलैया (बारा), ४ पुस / नागरिक उन्मुक्ति पार्टी तथा थारु कल्याणकारी संघ बाराले रेशम चौधरीको रिहाईको माग गर्दै खबरदारी सभाको आयोजना गरेको छ । मुलुकी फौजदारी कार्यविधि संहिता (पहिलो संशोधन) अध्यादेश प्रमाणीकरणको माग गर्दै नागरिक उन्मुक्ति पार्टी तथा थारु कल्याणकारी संघ बाराले सदरमुकाम कलैयामा ¥याली, धर्ना सहित खबरदारी सभाको आयोजना गरेको हो । थारु कल्याणकारी संघ एवं नागरिक उन्मुक्ति पार्टीका नेता कार्यकर्ता सहितको ¥याली जिल्ला प्रशासन कार्यालय बारा अगाडी धर्ना दिई भरत चोकमा पुगी खबरदारीसभामा परिणत भएको थियो ।
विभिन्न समूहसँग सरकारले गरेको सहमति कार्यान्वयनका लागि सरकारले अध्यादेश ल्याएपनि प्रमाणीकरण नभएको भन्दै सो पार्टीले धर्ना दिएको हो । प्रदर्शनमा सहभागीहरुले लाल आयोग सार्वजनिक गर, न्याय देउ, रेशम चौधरीलाई बाहिर लेउ, जनताका लागि लडेको जेलमै सड्नु परेको, मानवताको अधिकार, हाम्रो पनि अधिकार लेखिएका प्लेकार्ड प्रदर्शन गरेका थिए । यसअघि सरकारले अध्यादेश प्रमाणीकरणका लागि राष्ट्रपति कार्यालयसमक्ष पठाएपनि जारी हुन सकेको छैन । अध्यादेश प्रमाणीकरण गर्नुपर्ने भन्दै प्रदर्शन गरेका गरेका थिए ।
नागरिक उन्मुक्ति पार्टी बाराको जिल्ला अध्यक्ष रामचन्द्र चौधरीले लाल आयोगको ९१७ पानाको प्रतिवेदन सार्वजनिक गर, नेता अपहरण तथा निर्दोष जनतालाई फसाउने पूर्व आजिपीहरुले राष्ट्रपतिको चापलुसी गर्नेप्रति खबरदारी जनाउँदै विशुद्ध राजनीतिलाई केही ठुला दलका नेताहरु झालझेल गरी दुइ जिब्रे बोली राखी झुठा मुदामा रेशम चौधरी लाई फसाई राखेको आरोप लगाएका छन् ।
साथै कार्यक्रममा नागरिक उन्मुक्ति पार्टीको महिला नेतृ राधा चौधरी, थारु कल्याणकारी संघ बाराको जिल्ला संयोजक रामप्रसाद चौधरी, थाकसका जीतपुर सिमरा संयोजक संजय चौधरी, थाकसका कोल्हवी संयोजक भुवन चौधरी, युवा नेता तथा समाजिक अभियान्ता बृजेश कुमार सिंह तथा स्वतन्त्र युवा नेता रामकिशोर यादवले समर्थन जनाउदै आफ्नो मन्तव्य राखेका थिए । थारु कल्याणकारी संघ बाराका अध्यक्ष रामप्रसाद चौधरीको सभापतित्व तथा नागरिक उन्मुक्ति पार्टी बाराको जिल्ला अध्यक्ष रामचन्द्र चौधरीको प्रमुख आतिथ्यमा आयोजित कार्यक्रममा नागरिक उन्मुक्ति पार्टीका नेता ओमप्रकाश साह कलवार, महिला नेतृ उर्मिला महतो लगायत सयौ संख्यामा कार्यकर्ताहरुको सहभागिता रहेको थियो भने कार्यक्रम संचालन थारु कल्याणकारी संघका सचिव कृष्णा चौधरीले गरेका थिए ।