वीरगंज (पर्सा), १० मंसिर / सशस्त्र प्रहरीले वीरगंज स्थितबाट नेपालबाट भारतको धार्मिक स्थल बोधगयाका लागि गइरहेको बसबाट ठूलो मात्रामा तामाको जलपयुक्त बौद्ध धर्मावलम्वीहरुले प्रयोग गर्ने माला तथा सरसामान बरामद गरिएको छ ।
सशस्त्र प्रहरी बल बोर्डर आउट पोष्ट वीरगंज भन्सारका प्रहरी निरीक्षक रविन्द्र प्रसाद भट्टको नेतृत्वमा खटेको टोलीले नेपाल–भारत मैत्री बसमा लादेर अवैध रुपमा भारत लगिरहेको अवस्थामा उक्त सामग्रीहरु बरामद गरेको हो । बरामद सामग्रीको मूल्य लगभग १३ लाख ७१ हजार रुपैयाँ रहेको प्रहरी निरीक्षक भट्टले जानकारी दिए । बिहीबार काठमाडौँबाट वीरगंजको बाटो हुँदै भारतको बोधगयाको लागि हिडेको भारत–नेपाली मैत्री बसबाट बरामद गरिएको सामग्री कसैले दावी नगरेपछि प्रहरी सामग्रीहरु वीरगञ्ज भन्सार कार्यालयको जिम्मा लगाएको छ ।
बरामद भएका सामग्रीमध्ये दुईवटा मूर्ति अध्यागमन विभागले हवाई मार्गबाट भारत लग्न अनुमति दिएपनि भाडा कम लाग्ने भएपछि स्थलमार्गबाट लैजान थालेको भनी कागजातसहित दाबी गर्न आएपछि सम्बन्धित व्यक्तिलाई मूर्ति फिर्ता गरिएको भट्टले बताए । प्रहरी निरीक्षक भट्टले सशस्त्र प्रहरी बल नेपाल बोर्डर आउट पोष्ट वीरगञ्जको जिम्मा सम्भालेपछि लगभग ३ महिनाको अवधिमा २ करोड रुपैयाँ बराबरका भन्सार छलीको सामग्री बरामद भएको छ ।
प्रतिक्रिया दिनुहोस् !