वीरगंज (पर्सा), ६ मंसिर / पर्सा क्षेत्र नं. २ को (क) मा सत्ता गठबन्धनका उम्मेदवार श्याम पटेल बिजयी भएका छन् । उनका निकट्तम प्रतिद्वन्दी जसपा एमाले गठबन्धनका उम्मेदवार रामनरेश प्रसाद यादवलाई एक हजार ६ सय ५७ मतले हराउँदै पटेल विजयी भएका हुन् । कांग्रेस पर्साका पूर्व जिल्ला सचिव समेत रहेका पटेलले १३ हजार ७ सय ७४ मत प्राप्त गरी विजयी भएका छन् भने उनका निकट्तम प्रतिद्वन्धी जसपा एमाले गठबन्धनका यादवले १२ हजार एक सय २७ मत प्राप्त गरेका छन् ।
यस अघिको निर्वाचनमा पनि यस क्षेत्रमा कांग्रेसका राजेश्वर प्रसाद साहले यादवलाई हराउँदै विजयी भएका थिए । दोस्रो पटक हार ब्योहोरेका यादव जसपा पर्सा अध्यक्ष समेत हुन् । प्रदेशसभा सदस्यमा निर्वाचित पटेल युवाहरुको माझमा पनि लोकप्रिय छन् । यसअघिको निर्वाचनमा उनले टिकट पाएका थिएनन् । त्यस्तै कांग्रेस पर्साको जिल्ला अधिवेशनमा जिल्ला सभापतिमा उम्मेदवारी दिएका पटेल संस्थापन पक्षका जनार्दन सिंह क्षेत्रीसँग पराजित भएका थिए । उनी प्रदेशसभा निर्वाचित भएको खुशियाली मंगलबार सांझ मतगणना स्थल ठाकुर राम बहुमुखी क्याम्पसबाट विजयी समेत निकालिएको थियो । वीरगंज नगरको बजार क्षेत्रमा परिक्रमा गर्दै उनको निवास सम्म पुगेका विजयी जुलुशमा सयौंको संख्यामा उनको समर्थकहरुको सहभागिता रहेको थियो ।
प्रतिक्रिया दिनुहोस् !