पर्सामा ५१ प्रतिशत मत खसेको अनुमान, मतगणना सोमबारदेखि हुने

वीरगंज (पर्सा), ४ मंसिर / पर्सा जिल्ला भरिमा शान्तिपूर्ण रुपमा मतदान सम्पन्न भएको छ । २ वटा अस्थायी सहित १ सय ६९ मतदान स्थल तथा ४ सय १२ मतदान केन्द्रमा शान्तिपूर्ण रुपमा मतदान भएको हो ।
जिल्लामा ५१ प्रतिशत भन्दा बढि मत खसेको मुख्य निर्वाचन अधिकृत विनोदकुमार पोखरेलले जानकारी दिए । ‘मतदान अधिकृत आएर मतपेटिका नबुझाएसम्म यकिन तथ्यांक आउँदैन,’ उनले भने, ‘सुरक्षा निकायले संकलन गरेको विवरण अनुसार ५१ प्रतिशत भन्दा बढी मत खसेको अनुमान छ ।’ ४ वटा निर्वाचन क्षेत्र रहेको पर्सामा ३ लाख ४५ हजार ९ सय २८ मतदाता छन् ।

सोमबारदेखि मतगणना शुरु हुने
निर्वाचन आयोगले आइतबारदेखि नै मतगणना शुरु गर्न भनेपनि पर्सामा सोमबारदेखि मात्रै मतगणना शुरु हुने भएको छ । मतपेटिका संकल कार्य जारी रहेकोले सोमबार बिहानदेखि मात्रै मतगणना सुरु हुन सक्ने सम्भावना रहेको पर्साका प्रमुख निर्वाचन अधिकृत विनोदकुमार पोखरेलले बताए । मतपेटिका संकलन गर्दा राति अबेर हुने भएकोले सोमबार बिहानदेखि मात्रै मतगणना सुरु गरिने पोखरेलको भनाइ छ ।
४ वटा प्रतिधिधिसभा र ८ वटा प्रदेशसभा निर्वाचन क्षेत्र रहेको पर्सामा २ ठाउँमा मतगणना गर्न लागिएको छ । पर्सा निर्वाचन क्षेत्र न. १ र २ को मतगणना वीरगञ्ज स्थित ठाकुरराम बहुमुखी क्याम्पसमा गर्ने गरी तयारी गरिएको छ भने क्षेत्र नम्बर ३ र ४ को मतगणना पोखरिया नगरपालिका–४ मा रहेको जिल्ला उचाङ्गल रामदेव कलवार नमुना प्राविधिक विद्यालयमा हुनेछ ।
‘क्षेत्र नम्बर १ र २ को मतपेटिका ठाकुरराम बहुमुखी क्याम्पसमा र क्षेत्र नम्बर ३ र ४ को पोखरिया स्कुलमा संकलन गर्छौं,’ उनले भने, ‘मतपेटिका संकलन गरिसक्दा राति अबेर हुन्छ । मतगणनामा उम्मेदवारको प्रतिनीधि पनि राख्नुपर्ने हुन्छ । भोलि बिहान (सोमबार) सर्वदलीय बैठक बसेर मतगणना सुरु गर्ने तयारी छ ।’
शुरुमा प्रत्यक्ष तर्फ प्रतिनिधिसभा र प्रदेशसभा सदस्यहरुको मत गणना गरिनेछ । हरेक क्षेत्रका लागि ३ वटा कोठा तयार पारेर मत गणना गर्नेगरी तयारी गरिएको मुख्य निर्वाचन अधिकृतको कार्यालयले जनाएको छ ।
मतगणना स्थल तयारी अवस्थामा रहेको बताउँदै पोखरेलले आयोगले तोकेको प्रक्रिया पुरा गरेर सुरक्षित तरिकाले मतगणना गर्ने बताए । ‘मतगणना स्थल पूर्ण तयारी अवस्थामा छ । सीसी क्यामेरा र तारजाली लगाएका छौं’ उनले भने ।