वीरगंज (पर्सा), ३ मंसिर / पर्सा प्रहरीले प्रतिनिधिसभा सदस्यका उम्मेदवार जालिम मियाँका छोरालाई नमुना मतपत्र तथा स्वस्तिक छाप सहित पक्राउ गरेको छ । पर्सा क्षेत्र नं. ४ बाट जसपा – एमाले गठबन्धनबाट प्रतिनिधिसभा सदस्यका उम्मेदवार रहेका मियाँका छोरालाई शनिबार दिउँसो कालिकामाई गाउँपालिका स्थितबाट पक्राउ गरेको हो ।
मियाँका छोरा सबिर अहमद ५ सय ९८ थान मतपत्र र ४ थान स्वस्तिक छाप सहित पक्राउ परेका हुन् । अहमदलाई प्रहरीले कालिकामाई गाउँपालिका वडा नम्बर १ को मुडली गाउँबाट पक्राउ गरेको जिल्ला प्रहरी कार्यालय पर्साका प्रहरी नायब उपरीक्षक दिपक गिरिले जानकारी दिए । मुडलीमा सवारी साधन चेकजाँचका क्रममा बा १४ च ४७४८ नम्बरको हाइलेक्स गाडी रोकेर चेकजाँच गर्दा गाडी भित्रबाट नक्कली मतपत्र र स्वस्तिक छाप बरामद गरिएको गिरिले बताए ।
मौन अवधिको समयमा चुनावी प्रचार प्रसार गर्ने सामग्रीसहित भेटिएको कारण अहमदलाई पक्राउ गरिएको गिरिले बताए । अहमदलाई मतपत्र, छाप, गाडीसहित पर्सा निर्वाचन क्षेत्र नम्बर ४ का प्रमुख निर्वाचन अधिकृतको कार्यालयको जिम्मा लगाइएको छ भने नमुना मतपत्र तथा स्वस्तिक छाप सहित पक्राउ परेका मियाँलाई तारेखमा छाडिएको गिरीले जानकारी दिए ।
प्रतिक्रिया दिनुहोस् !