राष्ट्र निर्माणको लागि ‘लौरो’ छापमा मतदान गर्न आग्रह

वीरगंज (पर्सा), २९ कात्तिक / पर्सा क्षेत्र नं. १ (ख) बाट प्रदेश सभा सदस्यका लौरो चुनाव चिन्हका उम्मेदवार रहेका ओमप्रकाश सर्राफले राष्ट्र निर्माणको लागि लौरो(छडी) छापमा मतदान गर्न आग्रह गरेका छन् । यसैक्रममा वीरगंज महानगरपालिका वडा नम्बर १६ को शिवम टोलमा पनि चुनावी घरदैलो गर्न पुगेका सर्राफलाई स्थानीयले समर्थन गर्दै स्वागत गरेका छन् । मतदातासँगको भेटघाटमा सर्राफले जनताले देखेका सपनालाई सार्थकता प्रदान गर्ने बेला अहिले आएकाले सही मुल्यांकन गरेर मत दिन आग्रह गरे ।
यसअघि जितेर मुख्यमन्त्री समेत बनेका यस क्षेत्रका जनप्रतिनिधीबाट जनता निराश र आक्रोशीत रहेको भन्दै उनले अब त्यसको जवाफ दिने सहि समय आएको पनि बताए । मंसिर ४ गते हुने निर्वाचनले अब देश र जनताको भविष्य निर्धारण गर्ने बताउँदै सर्राफले सक्षम र सबल उम्मेदवारलाई मतदान गर्न आग्रह गरे । सर्राफले भने, ‘जनतालाई मुर्ख सम्झिने समय अब छैन, धेरै भयो जनतालाई झुठो आश्वासन देखाएको, तर अब आश्वासन देखाउने हैन, काम गर्ने बेला आएको छ, त्यसैले काम गर्ने उम्मेदवारलाई मतदान गर्न आवश्यक छ ।’
चुनावी घरदैलो कार्यक्रममा समुनापतिक उमेदवार गुड्डी जोशीको पनि सहभागीता थियो ।