राष्ट्र निर्माणको लागि ‘लौरो’ छापमा मतदान गर्न सर्राफलको आग्रह

वीरगंज (पर्सा), २६ कात्तिक / पर्सा क्षेत्र नं. १ (ख) बाट प्रदेश सभार सदस्यका उम्मेदवार रहेका ओमप्रकाश सर्राफले राष्ट्र निर्माणको लागि लौरो (छडी) छापमा मतदान गर्न आग्रह गरेका छन् । वीरगंज महानगरपालिका वडा नं. १६ नगवामा आज आयोजित घरदैलो कार्यक्रममा लौरो उम्मेदवार सर्राफले राष्ट्र निर्माण कार्यमा सबै पार्टी असफल भईसकेकोले देशैभरि जागेको परिवर्तनको लहरमा एकचोटी ‘लौरो (छडी)’ छापमा मतदान गरि आफूलाई पनि काम गर्न मौका दिने आग्रह गरेका हुन् ।
यस क्षेत्रबाट उम्मेदवारी दिएका अन्य प्रदेशसभा सदस्यका उम्मेदवारहरुलाई उत्साजनक युवाहरुको साथ पाउँदै कडा टक्कर दिईरहेका लौरो उम्मेदवार सर्राफले अब यहाँका नागरिकहरुले मुल्याङकन गर्ने बेला आएको भन्दै आफूलाई जिताएर मौका दिनुस्, कहिल्यै शिर झुक्ने काम नगर्ने आवश्सन दिए । विगतमा जितेर गएकाहरुले विभिन्न भ्रष्टाचार काण्डमा मुछिएका तथ्यहरू मतदातालाई बुझाउँदै मुख्यमन्त्री राउतले मधेश मात्रै होईन वीरगंजको समेत शिर झुकाउने काम गरेको सर्राफले बताए ।
वीरगंजको मात्रै नभई पुरै मधेशकै विकासकै शिक्षा, स्वास्थ्य, कृषि तथा रोजगारीमा कसरी विकास गर्न सकिन्छ भन्नेबारे आफूसँग ठोस् योजना रहेको बताए । सर्वसाधारण गरिब, निमुखा परिवारको स्वास्थ्यसँग पनि खेलवाड गरिएको छ, गरिबहरुले सेवा पाउने नारायणी अस्पतालमा राजनीतिकरण भएको छ, यसको सुधार हुनुपर्छ, आफू पदमा नहुँदा सुधारको लागि ५ वर्षसम्म संघर्ष गरेको उदाहारण स्मरण गराउँदै सर्राफले आफू विजयी भए प्राइभेट अस्पतालबाट सरकारी अस्पतालमा सेवा लिन आउनेहरुको संख्या बढ्ने गरि सुधार गर्ने दाबी गरे ।
आफ्नो क्षेत्रमा पर्ने ९ वटा वडाका युवाहरुलाई प्रत्येक वर्ष १ हजारको दरले ५ वर्षमा ५ हजार बेरोजगार युवाहरुलाई निःशुल्क सिपमुलक तालिम दिइनेछ भन्दै लागुऔषध दुव्र्यसनीमा फसेका युवाहरुलाई उपचार गर्नुका साथै सुधार गरि सिप सिकाई आत्मनिर्भर गराउने जस्ता सोच र भिजनको साथ अगाडि बढेको सर्राफको दाबी छ ।