वीरगंज (पर्सा), २६ कात्तिक / प्रदेशसभा र प्रतिनिधिसभा सदस्यको निर्वाचन नजिकिएसँगै पर्सामा राजनीतिक चासो चुलिएको छ । पाँच दलीय गठबन्धनका कारण पर्सा क्षेत्र नम्बर १ लोकतान्त्रिक समाजवादी पार्टी (लोसपा)को भागमा परेको छ ।
प्रतिनिधिसभा सदस्यका आकांक्षी नेपाली कांग्रेसका नेता अजय द्विवेदीले टिकट नपाएपछि बागी उमेदवारी दिएका छन् । द्विवेदी सत्तारुढ दल नेपाली कांग्रेसको निर्देशनविपरित गठबन्धनका उमेदवारलाई सघाउनुको साटो हराउन लागेका छन् । कांग्रेसबाटै द्विवेदीकै श्रीमतीको नाम भने प्रतिनिधिसभा सदस्यको समानुपातिकभित्र अन्तिम बन्द सूचीमा अटाएको छ । तर, उनी बागी उमेदवारी दिने द्विवेदीको प्रचारप्रसारमा खटिरहेकी छन् । निर्वाचन आयोगले प्रकाशन गरेको ८२ पृष्ठको सूचीमध्ये तिवारीको नाम ३७ पृष्ठको क्रम संख्या १०१ मा उल्लेख छ ।
पार्टीको विधि र विद्यानविपरित बागी उमेदवारी दिएको भन्दै द्विवेदीलाई पार्टीले पाँच वर्षसम्म साधारण सदस्यसमेत नरहने गरी निलम्बन गरिसकेको छ । यता, नेपाली कांग्रेसका नेता तथा कार्यकर्ता भने दोधारमा छन् । मंसिर ४ गते हुने प्रदेशसभा र प्रतिनिधिसभा सदस्यको निर्वाचनमा प्रतिनिधिसभा सदस्यमा कसलाई मत दिने भन्ने अन्योल यस क्षेत्रका कांग्रेसी नेतामा स्पष्ट देखिन्छ ।
क्षेत्र नम्बर १ मा निवर्तमान सांसद एवम् लोकतान्त्रिक समाजवादी पार्टी (लोसपा)का नेता लक्ष्मणलाल कर्ण छन् । अर्काेतिर करिब ४ दशकसम्म कांग्रेसमै रहेर एक दशक लगातार पार्टीको जिल्ला सभापति भएर नेतृत्व गरेका अजय कुमार द्विवेदी छन् । कांग्रेस नेतृत्वको सत्ता गठबन्धनका आधिकारिक उम्मेदवार कर्ण हुन् भने द्विवेदी पार्टीबाट टिकट नपाएर रुष्ट भएका बागी उमेदवार हुन् ।
पार्टीको विधि र विद्यानलाई मान्ने हो भने कांग्रेसी नेता कार्यकर्ताहरूले गठबन्धनका उमेदवार कर्णलाई नै मतदान गरेर जिताउनुपर्नेछ । तर, कांग्रेसकै नेता कार्यकर्ता खुलेआम गठबन्धनविरुद्ध बागी उमेदवार द्विवेदीको समर्थनमा हिँडेका कांग्रेस नेताहरुकै गुनासो छ ।
प्रतिक्रिया दिनुहोस् !