पर्सा १ का प्रतिनिधिसभा सदस्य उम्मेदवार डङ्गोलको चुनावी एजेण्डा

वीरगंज (पर्सा), २४ कात्तिक / झण्डै ४ दशकसम्म नेपाली कांग्रेसमा रहेका किरणमान डंगोल राष्ट्रिय राजेन्द्र लिङ्गदेन नेतृत्वको प्रजातन्त्र पार्टी (राप्रपा) बाट पर्सा क्षेत्र नम्बर १ का प्रतिनिधि सभा सदस्य उम्मेदवार हुन् । २०३७ सालदेखि नेपाली कांग्रेसको भातृ संगठन नेपाल विद्यार्थी संगठन (नेविसंघ) को ठाकुरराम बहुमुखी क्याम्पसको सभापतिका दावेदार रहेका उनी मधेश विश्वविद्यालयका उपकूलपति प्राध्यापक डा. दीपक शाक्य, युवराज खातीका समकक्षी हुन् ।
उनी राजनीतिका साथै अन्य क्षेत्रबाट पनि समाजसँग जोडिएका थिए । उनकै घरबाट आजभन्दा करिब ५ दशक अघि अचेल साप्ताहिक पत्रिका पनि प्रकाशन हुन्थ्यो । पत्रकारिता क्षेत्रलाई पनि उनले नजिकबाट नियाल्ने अवसर त्यतिबेला प्राप्त गरे । खेलकुद तथा संस्कृतिको संरक्षणका लागि आफ्नै नेतृत्वमा स्थापना गरिएको योङ्स्टार्स क्लब नेपालकै पहिलो संस्था भएको उनी दावी पनि गर्छन् । जुन अहिले नारायणी स्पोटर्स क्लबको रुपमा यस क्षेत्रमा परिचित छ । त्यसमार्फत खेल क्षेत्रसँगै कला एवम् संस्कृतिको लागि पनि विभिन्न उपलब्धीमुलक काम गरिएको डङ्गोलको दावी छ ।
पत्रकारिता, कलाकारिता र खेल क्षेत्रसँगै करिब ४ दशकसम्म नेपाली कांग्रेसबाट राजनीति गरेका उनी क्षेत्रीय प्रतिनिधिमा ४ पटक निर्विरोध निर्वाचित भएका थिए भने एकपटकको निर्वाचनमा पनि विजयी भएर क्षेत्रीय प्रतिनिधि भएका थिए । नेपाली कांग्रेसनिकट नेपाल ट्रेड युनियनको पनि जिल्ला कमिटीको सचिव भएर काम गरेको अनुभव उनले बटुलेका थिए । विपि कोइराला, कृष्णप्रसाद भट्टराई, गणेशमान सिंह जस्ता व्यक्तिहरुको व्यक्तित्व र विचारबाट प्रभावित भएर कांग्रेसी भएका डङ्गोलले कांग्रेस विचार र सिद्धान्तबाट विचलित भएको र प्रधानमन्त्री एवम् पार्टी सभापति शेरबहादुर देउवाले विपिको सिद्धान्तलाई बेवास्ता गरेको भन्दै डङ्गोलले राष्ट्रिय प्रजातन्त्र पार्टी (राप्रपा) रोजे ।
संवैधानिक राजतन्त्र, बहुदलीय प्रजातन्त्र र हिन्दु राष्ट्रको सिद्धान्तलाई अंगिकार गर्दै २०७९ सालमा भएको स्थानीय तहको निर्वाचनभन्दा अघि राप्रपामा आवद्ध भएको डङ्गोलले बताए । राप्रपामा आवद्ध हुनेबित्तिकै उनलाई राप्रपा अध्यक्ष राजेन्द्र लिङ्गदेनले मधेश प्रदेशको संगठन विभाग प्रमुखको जिम्मेवारी दिए । साथै क्षेत्र नम्बर १ को निर्वाचन परिचालन कमिटीको अध्यक्ष पनि उनी नै हुन् । अङ्ग्रेजी विषयमा स्नातकसम्मको अध्ययन गरेका उनले वीरगञ्जदेखि बिराटनगर हुँदै, हेटौडा, चितवन, पोखरा, जोमसोम लगायतका स्थानमा १ सय ५० भन्दा बढी सांस्कृतिक कार्यक्रम गरेका छन् ।
पर्साको वीरगञ्ज महानगरपालिका वडा नम्बर ५ कुम्हाल टोल निवासी डंगोलले नेपाल टेलिभिजनमासमेत गीत गाउने अवसर प्राप्त गरेका थिए । भोजपुरी टेलि सिरियलमा नायकको भूमिका समेत निर्वाह गरेका डङ्गोलले जोश र जागरले भरिएका युवाहरुलाई विदेश पलायन हुनबाट रोक्ने आफ्नो प्रमुख प्राथमिकताको विषय भएको बताएका छन् । त्यसका लागि बेरोजगार युवा संघको स्थापना गरेर युवाहरुलाई एकिकृत गरी उनीहरुको क्षमता र योग्यताअनुसारको रोजगारीको सृजना गर्नका लागि वीरगञ्जका उद्योगी एवम् व्यवसायीहरुसँग समन्वय गर्ने योजना डङ्गोलको छ ।
अदक्षलाई प्रशिक्षण र तालिमको व्यवस्था गर्नुका साथै दक्षलाई योग्यताअनुसारको जिम्मेवारी दिलाउने उनको प्रतिबद्धता छ । साथै उनले पर्सा जिल्लाको मध्यभागमा पर्ने जगरनाथपुर गाउँपालिकामा राष्ट्रिय स्तरको अस्तपताल खोल्नका लागि पनि पहल गरेर बजेट बिनियोजन गराउने बताएका छन् । पत्रकार, खेलाडी, कलाकार र साहित्यकारको लागि २५ लाख रुपैयाँको अक्षय कोष खडा गरेर निज र निजका परिवारलाई निःशूल्क औषधी उपचारको व्यवस्था गर्ने पनि उनको योजना छ ।