वीरगंज (पर्सा), २४ कात्तिक / आसन्न प्रतिनिधिसभा र प्रदेशसभाको निर्वाचनमा सिमानाकाको सुरक्षा व्यवस्थाको बिषयमा दुई देशका सिमा प्रहरीबीच बिहिबार वीरगंज छलफल तथा समन्वय बैठक सम्पन्न भएको छ । वडा प्रहरी कार्यालय विर्ता अन्तर्गतका वीरगंज महानगरको मुख्य सिमा प्रहरी कार्यालयहरु र भारत विहार राज्य, रक्सौल सिमाका प्रहरी कार्यालयका प्रतिनिधिहरुविच छलफल तथा परिचय कार्यक्रम सम्पन्न भएको वडा प्रहरी कार्यालय विर्ताका प्रहरी निरिक्षक विशाल मल्लले वताए ।
वडा प्रहरी कार्यालय विर्तामा भएको बैठकमा सिमानाकाहरुको सुरक्षा लगायत दुवै देशका प्रहरीहरुबीच सहयोग आदान–प्रदान र सिमा अपराध नियन्त्रण गर्ने विषयमा छलफल भएको प्रहरी निरिक्षक मल्लले जानकारी दिए । उक्त छलफलमा प्रहरी निरीक्षक मल्लको नेतृत्वमा मातहतका सिमा प्रहरी चौकी नगवा, इनर्वा, छपकैया, सिर्सिया, इनर्वागाँउ र भारत विहार राज्य, रक्सौल प्रहरी कार्यालयका तर्फबाट सब डिभिजन पोलिस अफिसर रक्सौलका (एसपि) श्रीचन्द्र प्रकाश (आइपिएस) को नेतृत्वमा रक्सौल, अदापुर, महुवा, हरपुर, भेलही र हरैया थानाका थाना प्रभारीहरुको सहभागिता रहेको थियो ।
यसैगरी निर्वाचन सम्बन्ध मै जिल्ला स्तरिय सुरक्षा समितिको बैठक बिहिबार सम्पन्न भएको छ । प्रमुख जिल्ला अधिकारी उमेश कुमार ढकालको अध्यक्षतामा बसेको बैठकमा आसन्न प्रतिनिधि सभा तथा प्रदेश सभा सदस्य निर्वाचन, २०७९ लाई स्थानीय स्तरमा प्रभावकारी समन्वय गरी निर्वाचन सुरक्षालाई भरपर्दो बनाई शान्तिपूर्ण रुपमा निर्वाचन सम्पन्न गर्न निर्णय भएको जिल्ला प्रशासन कार्यालय पर्साले जनाएको छ ।
बैठकमा सुरक्षा समितिका पदाधिकारी, प्रतिनिधि सभा सदस्य निर्वाचनका निर्वाचन अधिकृत र प्रमुख जिल्ला अधिकारीको अधिकार प्रयोग गर्ने गरी खटिने घुम्ती टोलीका अधिकृतहरु र उक्त निर्वाचन क्षेत्रको सुरक्षार्थ फिल्डस्तरमा खटिने मोबाईल, स्ट्राईकिङ्ग, घुम्ती टोली, नेपाली सेना, नेपाल प्रहरी, सशस्त्र प्रहरी र राष्ट्रिय अनुसन्धानका कर्मचारीहरुसँग अन्तक्रिया गरी निवार्चन अघि, निर्वाचनको दिन र निर्वाचन पश्चातका अवधिमा हुन सक्ने विभिन्न सुरक्षा चुनौतीबारे छलफल भएको थियो ।
प्रतिक्रिया दिनुहोस् !