वीरगंज (पर्सा), २२ कात्तिक / नेपाली काँग्रेसले पार्टीको विधान विपरित गएर (बागी) भई स्वतन्त्र उम्मेदवारी दिने पर्साका ३ जना नेता सहित ७४ जनालाई निष्काशित गरेको छ । पार्टीको विधान विपरित गएर पार्टीको निर्देशनलाई अटेरी गरि पार्टीलाई सहयोग नगरि (बागी) भई स्वतन्त्र उम्मेदवारी दिने देशैभरिका ७४ जनालाई ५ वर्षको लागि साधारण सदस्य समेत नरहने गरि निष्काशित गरेको हो ।
निष्काशनमा पर्सा क्षेत्र नं. १ का नेपाली काँग्रेसका बागी उम्मेदवार अजय द्विवेदी पनि परेका छन् । उनका साथै सुधिर पटेल र चन्द्र किशोर पनि रहेका छन् । नेपाली काँग्रेस केन्द्रिय अनुशासन समितिले पर्साका नेपाली काँग्रेसका नेताहरु द्विवेदी, पटेल र चौधरी सहित देशैभरिबाट ७४ जनालाई पार्टीबाट निष्काशन गरेको हो ।
द्विवेदीसँगै पार्टीबाट निष्काशित हुनेमा पर्साका काँग्रेसका क्रियाशील सदस्य सुधिर पटेल र क्षेत्रीय प्रतिनिधी चन्द्र किशोर चौधरी पनि रहेका छन् । द्विवेदीले पर्सा १ को प्रतिनिधीसभा सदस्यमा, पटेलले पर्सा १ को (क) बाट प्रदेशसभा सदस्यमा र चौधरीले पर्साको ३ को (ख) प्रदेशसभा सदस्यमा स्वतन्त्र उम्मेदवारी दिएका छन् । पर्साका तीन जना सहित देशभरका ७४ जनालाई पाँच वर्षका लागि साधारण सदस्य समेत नरहने गरी निष्काशन गर्न नेपाली काँग्रेसको केन्द्रिय अनुशासन समितिले निर्देशन दिएको हो । निष्काशित हुनेहरुमा आफ्नो पार्टीका आधिकारिक उम्मेदवार विरुद्ध उम्मेदवारी दिएका र त्यस्ता उम्मेदवारको प्रस्तावक तथा समर्थक बसेका पदाधिकारी तथा सदस्य रहेका छन् ।
यस्तै, पर्सामा क्षेत्र नं. १ मा बाम लोकतान्त्रिक गठबन्धनका उमेदवार लोसपा लक्ष्मणलाल कर्णको लागि भोट नमागेर बागी उमेदवार द्विवेदीका लागि भोट माग्ने अन्य काँग्रेस नेता कार्यकर्ता पनि अबको टार्गेटमा रहेको नेपाली काँग्रेस पर्साका प्रवक्ता रमेश पाण्डेले बताए । पाण्डेले पार्टीको विधान अनुसार बागी उमेदवारका प्रस्तावक र समर्थकको पनि सदस्यता स्वतः खारेज भएको बताए । साथै, गठबन्धनका आधिकारिक उमेदवारको विरोधमा र बागी उमेदवारको समर्थनमा घरदैलो, सभा, भेला लगायतमा सहभागी हुने पर्साका नेता कार्यकर्ता निगरानीमा रहेको पाण्डेले बताए ।
त्यस्ता नेता र कार्यकर्ताहरु विरुद्ध विस्तारै कारवाही अघि बढाइने पाण्डेको भनाई छ । हाललाई बागी उमेदवारको समर्थनमा हिँडेका क्षेत्र नं. १ क्षेत्रीय सभापति अरविन्द गुप्तालाई ७ दिने स्पष्टीकरण सोधिएको उनले जानकारी दिए । यसैगरी, पर्साको क्षेत्र नं. ३ का काँग्रेसका आधिकारिक उमदेवार सुरेन्द्र प्रसाद चौधरीको उजुरीको आधारमा सोही क्षेत्रका नेता रामेश्वार रौनियार विरुद्ध छानविन भइरहेको पनि बताए । उजुरी अनुरुप आरोप पुष्टि भए विधानत सदस्यता खारेज हुने उनले बताए ।
प्रतिक्रिया दिनुहोस् !