वीरगंज (पर्सा), १० कात्तिक / न्यूज २४ टेलिभिजनले वीरगंजमा ‘सामुहिक भाईटिका’ कार्यक्रम सम्पन्न गरेको छ । वीरगंज आदर्शनगर स्थित पुरानो बसपार्कमा नेवार, पहाडी, मधेशी, थारु, मारवाडी तथा मैथली समुदायका व्यक्तिहरुलाई एकै ठाउँमा भेला सामुहिक भाईटिका कार्यक्रम सम्पन्न भएको छ ।
भाईटिका पहाडी समुदायको विशेष पर्व रहेकोले एक अर्का समूदायलाई एकै ठाउँमा राखी एकआपसमा सद्भाव कायम राख्ने उद्देश्यले उक्त कार्यक्रमको आयोजना गरिएको थियो । कार्यक्रममा सहभागी सशस्त्र प्रहरी नायब महानिरीक्षक गणेश ठाडामगरले यस कार्यक्रमले एक अर्काको समुदायबीच भाइचारा कायम गर्न सहयोग पुग्ने विश्वास व्यक्त गरे । यो भाईटिका सँस्कृत्ति कस्तो छ भन्ने सम्पूर्ण समुदायलाई चिनाउन यस कार्यक्रम उल्लेख्नीय भूमिका निर्वाह गर्ने बताए ।
भाईटिका कार्यक्रमलाई नयाँ सन्देश दिने उद्देश्यले आयोजित कार्यक्रममा सहभागी वीरगंज उद्योग वाणिज्य संघका अध्यक्ष सुबोध गुप्ताले विभिन्न जातजाति, धर्मका व्यक्तिहरु एकै ठाउँमा बसेर हर्षोल्लासका साथ भाईटिका मनाई रहेको अवस्थाले गर्भान्वित महसुस भएको भन्दै हाम्रो समाजमा आमाबुवा, भाईबहिनीको सम्बन्धलाई गाँस्ने पर्व त्यवहारहरुलाई विर्सनु हुँदैन र हामी सबै मिलेर मनाउनुपर्छ भन्ने सन्देश दिएको बताए ।
कार्यक्रममा सहभागी पूर्व मेयर विजय सरावगीले यो नौलो अनुभव महसुस भएको बताए । हामी आफ्नो घर परिवारमा भाईटिका मनाउने गरेका छौं तर यसरी सम्पूर्ण समुदायका व्यक्तिहरुबीच एक आपसमा भाईटिका मनाउँदा यसले समाजमा नौलो सन्देश दिएको बताए । यसरी नै वीरगंज स्थित मानवसेवा आश्रमका संरक्षक दिवेश गुप्ताले मानवता भन्दा ठुलो धर्म, जात नरहेको भन्दै यस्ता कार्यक्रमले सबैको आत्मियतालाई जोड्दै मानवीयतालाई दर्शाउने गरेको बताए ।
भाईटिकाको बखत आफ्नो भाई नभएकाहरु एवं घरपरिवारसम्म पुग्न नसकेका भाईहरु सहभागी बहिनीहरुसँग टिका लगाएका थिए । सहभागी कतिपय व्यक्तिहरुले आफ्नो समुदाय लगायत अन्य समुदायका बहिनीहरुसँग पनि टिका लगाएका थिए ।
कार्यक्रममा मधेश प्रदेशका मुख्यमन्त्री लालबाबु राउत गद्दी, नेपाल प्रहरीका प्रहरी उपरीक्षक रमेश बस्ने, सशस्त्र प्रहरी उपरीक्षक तेज प्रसाद पोखरेल, नेपाली सेनाका गणपति डायमण्ड कार्की लगायत मारवाडी समुदाय, भोजपुरी समुदाय, मधेशी समुदाय, पहाडी समुदाय लगायतका व्यक्तित्वहरुको उल्लेख्यनीय उपस्थिति रहेको थियो ।
कार्यक्रमलाई न्यूज २४ टेलिभिजनका नेपाल व्युरो प्रमुख राजु श्रेष्ठ तथा पर्सा संवाददाता मुस्कान श्रेष्ठले संचालन गरेका थिए ।
प्रतिक्रिया दिनुहोस् !