छठ पर्वको तयारी तिब्र गतिमा, जलासयहरुलाई दुलही जस्तै सिंगारिदै

वीरगन्ज (पर्सा), ९ कात्तिक / तराईबासीको महान पर्व छठ पुजाको लागि तयारी तिब्र रुपमा भइरहेको छ । वीरगन्ज लगायत यस क्षेत्रका विभिन्न पोखरीलाई स्थानीय वासीको सहयोगमा विशेष रूपमा सिङ्गार्ने काम तदारुक्ताका साथ भइरहेको छ । पोखरीहरुलाई सरसफाई गर्नुका साथै दुलही जस्तै सिँगारिने कार्य धमाधम भइरहेको छ । तराईमा छठ पर्वको छुट्टै महत्व रहेको छ । पौराणिक महत्व बोकेका सरोवरहरू घडिअर्वा पोखरी, नगवापोखरी, छपकैया पोखरी लगायत श्रीपुर, रानीघाट स्थित रहेको पोखरीहरुलाई सरसफाई तथा सजाउने काम भइरहेको छ ।
अहिले नगरको सम्पूर्ण पोखरीहरुलाई टेण्ट गाडी, कपडाले सजाउने कार्य भइरहेको छ । विहादैनेखि कामदारहरु हातमा खन्ती लिई बाँस गाड्ने देखि लिएर टेण्टमा कपडा सजाउने कार्यमा व्यवस्त देखिन्छन् । तराईमा छठ पर्वको बेग्लै विशेषता छ र यस वर्ष छठ पर्व कात्तिक ११ गतेदेखि विधिवत रुपमा शुरु हुँदैछ । छठ पर्व शुरु हुनु अघि नै सम्पूर्ण पोखरी, तलाउहरुलाई दुलही जस्तो सिँगारी पुजा गर्ने प्रचलन रही आएको छ ।
वीरगंजको एतिहासिक घडिअर्वा पोखरीलाई पनि सजाउने काम धमाधम भइरहेको र समय भित्रै सजाउने काम सम्पन्न हुने छठ पुजा व्यवस्थापन समितिका अध्यक्ष हिरालाल साह कानुले जानकारी दिए । वीरगंजमा बडो धुमधामका साथ घडिअर्वा पोखरीमा भव्य तरिकाले छठ पर्व हुने गरेको छ । तयारीमा सबै कामदारहरु तदारुक्ताका साथ लागेको उनको भनाई छ । टेण्टदेखि पोखरीलाई सरसफाई, सुरक्षा लगायतको विषयमा विशेष ध्यान पु¥याइएको अध्यक्ष कानुको भनाई छ ।
घडिअर्वा पोखरीको सजावटको काम ७५ प्रतिशत सम्पन्न भइसकेको छठ पुजा व्यवस्थापन समितिका उपाध्यक्ष दिलीप साह कानुले जानकारी दिए । उनका अनुसार तयारीको काम जोडतोडले भइरहेको छ, विजुली बत्तीको काम र सरसफाईको काम केही मात्रामा कमि छ, यो पनि भोलिदेखि शुरु हुने उनको भनाई छ । पोखरीमा रहेको पानीको मात्रालाई घटाउने बढाउनेबारे पनि छलफल भइरहेको कानुले बताए ।
सजावटमा प्रत्येक वर्ष नयाँ कपडा, फुल, झिलीमिली बत्ती लगायतका सामानहरुमा वर्षेनी १२ देखि १५ लाख रुपैयाको लागतमा घडिअर्वा पोखरी सजाउने गरिएको छ । यस वर्ष पनि करिब १४ लाखको लागतमा घडिअर्वा पोखरीलाई सजाउने लक्ष्य लिइएको अध्यक्ष कानुको भनाई छ । छठ पर्वमा आउने ब्रतालुहरुको सुरक्षालाई मध्यनजर राख्दै महिला तथा पुरुष प्रहरी एवं ट्राफिक प्रहरीहरुलाई पनि परिचालन गरिने बताइएको छ ।
अर्कोतर्फ सुरक्षालाई अझ मजबुत तुल्याउनका लागि घअिडर्वा पोखरीमा सिसि क्यामरा जडान पनि जडान गरिने बताइएको छ । यसैगरि वीरगन्जको चर्चित छठ स्थल नगवा तथा रानीघाट स्थित छठघाटलाई पनि विभिन्न तामझामका साथ सजाउने कार्य भइरहेको छ ।