समाजमा दिनप्रतिदिन आयुर्वेद चिकित्साको महत्व बढ्दै गएको छ : प्रदेश प्रमुख मिश्रा

वीरगंज (पर्सा), ६ कात्तिक / मधेश प्रदेश प्रमुख हरिशंकर मिश्राले दिन प्रतिदिन समाजमा आयुर्वेद चिकित्साको महत्व बढ्दै गएको बताए । ७ औं आयुर्वेद दिवसको अवसरमा वीरगंज स्थित भारतीय महावाणिज्य दुतावासद्वारा आयोजित आयुर्वेद शिक्षा कार्यक्रमलाई सम्बोधन गर्दै प्रदेश प्रमुख मिश्राले समाज अहिले पनि आयुर्वेद शिक्षाबारे अनभिज्ञ रहेकोले आयुर्वेद उपचारको बारेमा घरघरमा जानकारी फैलाउनु आवश्यक रहेको बताएका छन् ।
भान्छामा रहेको औषधी जस्तै लसुन, मेथी, तुलसीको पाता जस्ता आयुर्वेदिक वस्तुहरुबाट धेरै रोगको निवारण हुन सक्ने भएतापनि त्यसबारे सबैलाई जानकारी नभएको कारण आयुर्वेदि औषधी भन्दा हेलोपेथिक औषधीप्रति सर्वसाधारणहरुको विश्वास रहेकोले अबको दिनमा आयुर्वेद शिक्षाप्रति पनि सर्वसाधारणहरुलाई विश्वास बढाउन घरघरमा आयुर्वेद शिक्षाबारे जानचेतना फैलाउन आवश्यक रहेको बताए ।
आयुर्वेद चिकित्सामा प्रयोग गरिने पदार्थहरु पनि आयुर्वेद नै रहेको र त्यसलाई अनुसन्धान गरि वैज्ञानिहरुले हेलोपेथिक औषधी बनाउने गरेको कारण पनि बनाइएको औषधी भन्दा पनि प्राकृत्तिक आयुर्वेदिक औषधी नै प्रयोग गर्नु स्वास्थ्यको लागि उत्तम रहेको भन्दै प्रदेश प्रमुख मिश्राले अहिले आयुर्वेदिक औषधीहरुको बारेमा वैज्ञानिकहरुले अनुसन्धान गर्न थालेको चर्चा गरे ।
उनले मंगल ग्रहमा जीवन खोज्नु भन्दा पनि आयुर्वेदले मंगल प्रदान गर्ने बताए । आयुर्वेदको ज्ञान नभएको कारण गर्दा पनि सर्वसाधारणहरु हेलोपेथिक चिकित्सातर्फ बढि विश्वास गर्ने गरेको तर अब आयुर्वेद औषधीबाट ठूलठूलो रोगहरुको निवारण भइरहेको घटनाहरु सार्वजनिक हुन थालेपछि विस्तारै आयुर्वेद चिकित्सा तर्फ पनि सर्वसाधारणहरुको विश्वास बढ्दै गएको बताए ।
भारतले मनाउँदै आजादीको अमृत महोत्सव कार्यक्रम अन्तर्गत भारतीय महावाणिज्य दुतावासले हर दिन, हर घर आयुर्वेद नाराको साथ आयोजना गरेको कार्यक्रममा आयुर्वेद चिकित्सा शिक्षा सम्बन्धी जानकारी गराइएको थियो । अहिले पनि ग्रामीण भेगमा उम्रेका हरिया वनस्पतिहरु आयुर्वेद औषधीमा प्रयोग गर्न सकिने भएकोले प्राकृत्तिक सम्पदा, वनस्पतिहरुलाई जोगाउँदै ग्रामीण भेगका सर्वसाधारणहरुले आयुर्वेदिक औषधीबाट नै उपचार गर्ने गरेको प्रदेश प्रमुख मिश्राको भनाई छ ।
कार्यक्रममा मधेश प्रदेश अन्तर्गत विभिन्न जिल्लामा रहेको आयुर्वेद अस्पतालहरुका चिकित्सक डा. राकेश कुमार सिंह, डा. प्रभाकर मनु, डा. सुजित शर्मा, डा. मनिष कुमार सिंह, डा. नन्दकिशोर झा लगायतले आयुर्वेद चिकित्सा र खानपान, आहार विहार, आचार विचार र जीवनशैलीको बारेमा जानकारी गराउँदै उपस्थित व्यक्तिहरुसँग अन्तरक्रिया समेत गरेका थिए ।
कार्यक्रममा सहभागी आयुर्वेद चिकित्सकहरुले आयुर्वेदको वैज्ञानिक महत्वबारे अहिले भारत लगायत विभिन्न देशहरुले ठूलो अनुसन्धान भइरहेको उनीहरुको भनाई छ । त्यसमा पनि खास गरि प्रत्येक घरमा प्रयोग गरिने लसुन, तुलसीको पात, सहजन जस्ता आयुर्वेद वनस्पतिहरुको बारेमा ठूलो अनुसन्धान भइरहेको जानकारी गराएका थिए । कार्यक्रममा भारतीय महावाणिज्य दुतावासका महावाणिज्यदुत नितेश कुमारले स्वागत मन्तव्य व्यक्त गर्दै आयुर्वेद चिकित्सा प्रत्येक घरको लागि महत्वपूर्ण रहेको बताए । कार्यक्रममा वीरगंज उद्योग वाणिज्य संघका अध्यक्ष सुबोध गुप्ता, पर्साका प्रमुख जिल्ला अधिकारी उमेश ढकाल, प्रहरी उपरीक्षक रमेश बस्नेत लगायत भारतीय महावाणिज्य दुतावासका पदाधिकारीहरुको उपस्थिति रहेको थियो ।