संविधान दिवसको अवसरमा वीरगंज कारागारबाट ३७ जनाको कैद कट्टा, १ जनाले पाए सजाय माफी

• हरिशंकर शर्मा
वीरगंज (पर्सा), ३ असोज / संविधान दिवसको अवसरमा वीरगंज कारागारबाट ३८ जना कैदीहरु कारागारमुक्त भएका छन् । कारागारमुक्त हुनेहरुमध्ये ३७ जनाको कैद कट्टा गरिएको छ भने १ जनाको कैद सजाय मिनहा गरिएको छ । सातौं संविधान दिवसको अवसरमा राष्ट्रपति विद्यादेवी भण्डारीद्वारा देशभरिमा ६ सय ८१ जना कैदी बन्दीको कैद कट्टा तथा २१ जनाको सजाय माफी अन्तर्गत वीरगंज कारागारबाट ३८ जना कारागारमुक्त भएका हुन् ।
कारागार मुक्त हुनेहरुमा ६ जना महिला तथा ३२ जना पुरुष रहेका छन् । कर्तव्य ज्यान मुद्दाका पुरुष १४ जना (१ जनाको कैद सजाय माफी सहित), कर्तव्य ज्यान मुद्दाका महिला कैदी ५ जना, ज्यानमार्ने उद्योग मुद्दाका कैदी पुरुष ८ जना तथा महिला १ जना, चोरी मुद्दाका २ जना, डाँका मुद्दाका १ जना, सवारी ज्यान मुद्दाका ३ जना, लिखित सम्बन्धी कसुर÷किर्ते मुद्दाका २ जना, वन पैदावार काठ चोरी मुद्दाका १ जना, हातहतियार मुद्दाका १ जना गरि ३८ जना कैदी कारागारमुक्त भएको वीरगंज कारागार कार्यालयले जानकारी दिएको छ ।
कारागारमुक्त हुनेहरुलाई वीरगंज कारागारका जेलर मदन घिमिरेले अविर टिका लगाई विदाई गरेका थिए । उनले कारागारभुक्त भएका कैदीहरुको विदाई गर्दै विगतमा वितेका दिनहरुलाई विर्सेर अगामी जीवनको यात्रा सुखमय होस् भन्ने शुभकामना समेत दिएका थिए । आगामी दिनमा यस्ता अपराधिक क्रियाकलाप जस्ता कार्यबाट टाढा रही इमान्दारीतापूर्वक काम गरेर आफ्नो परिवारसँग सुखमय जीवन वितोस् भन्ने शुकामना सहित यहाँबाट सकारात्मक सुधार भएका कुरालाई आफ्नो जीवनमा लागु गर्न समेत आग्रह गरे ।
संविधानको धारा २७६ को फौजदारी कसुर ऐन, २०७४ तथा फौजदारी कसुर नियमावली, २०७६ मा मन्त्रिपरिषद्को सिफारिसमा राष्ट्रपतिले कैदी बन्दीको कैद मिनाहा गर्न सक्ने व्यवस्था अनुसार राष्ट्रपति भण्डारीले विगत वर्षहरू झै देशका विभिन्न कारागारमा रहेका ६८१ जना कैदीको कैद कट्टा गरेकी हुन् ।
यसैगरि देशभरिमा २१ जना कैदीले सजाय माफी पाएका छन् । संविधानको धारा २७६, मुलुकी फौजदारी कार्यविधि संहिता, २०७४ को दफा १५९ अनुसार, मन्त्रिपरिषद्को सिफारिसमा उनीहरूको सजाय माफी भएको गरिएको हो ।