बच्चा चोरेको भन्दै तीनजना शंकास्पद महिलालाई पक्राउ गरि प्रहरीको जिम्मा

• हरिशंकर शर्मा
वीरगंज (पर्सा), २२ भदौ / पर्सा प्रहरीले वीरगंजको छपकैया स्थितबाट तीनजना शंकास्पद महिलाहरुलाई पक्राउ गरेको छ । बच्चा चोरी गरेको स्थानीयहरुको सूचनाको आधारमा वडा प्रहरी कार्यालय वीर्ताका प्रहरी निरीक्षक विशाल मल्लको कमाण्डमा खटिएको प्रहरी टोलीले वीरगंज महानगरपालिका वडा नं. २ छपकैया स्थितबाट तीन जना अधवैशे महिलालाई पक्राउ गरेको छ ।
पक्राउ पर्ने तिनैजना महिला भारतीय नागरिक हुन् । भारतको रक्सौल स्थित इस्लामपुर बस्दै आएका तिनै जना महिला ५० देखि ५५ वर्ष उमेर समूहका रहेको बताइएको छ । भारतमा बच्चा चोर्ने घटनाहरु वृद्धि भएको सामाजिक सञ्जालमा छ्याप छ्यापी भएपछि नेपालमा पनि भारतीय महिलाहरुले बच्चा चोर्ने आएको हुन सक्ने आशंकामा छपकैयाबासीले पर्सा प्रहरीलाई सूचना दिएको थियो । सूचनाको आधारमा ति महिलाहरुलाई हेर्दा शंकास्पद लागेपछि प्रहरीले नियन्त्रणमा लिई जिल्ला प्रहरी कार्यालय पर्सालाई बुझाएको थियो ।
स्थानीय उमेश साह कानुका अनुसार ति महिलाहरुले बच्चालाई ५० रुपैया दिएर फकाएर लैजान खोजेको अवस्थामा आफूले पक्राउ गरेको बताए । ति महिलाहरु घरघरमा गएर पैसा माग्ने गरेको र अभिभावक पैसा लिन घरभित्र गएपछि त्यसको बच्चालाई लिएर भाग्न खोज्दा स्थानीयहरुले हल्ला गरेपछि आफूले पक्राउ गरेर प्रहरीको जिम्मा लगाएको बताए ।
तर यता ति महिलाहरुको आफन्तले औठीको व्यापार गर्ने महिलाहरुलाई बच्चा चोरीको आरोप लगाई पक्राउ गरिएको बताए । भारतको नरकटियागन्ज घर भई छपकैया स्थित डेरा लिई बस्दै औठीको व्यापार गर्दै आएको उनका आफन्तले आफूसँगै ति महिलाहरु औठीको व्यापार गर्नुको साथै घरघरमा गई राशीको औठी, घोडाको नालको औठी बेच्ने काम गर्दै आएको बताए ।
यता जिल्ला प्रहरी कार्यालय पर्साका प्रहरी नायब उपरीक्षक दिपक गिरीले पनि ति महिलाहरु औठी बेच्ने, छारफुकको नाममा दुई चार पैसा लिई जडिबुटी दिने, राशीको औठी दिने कामहरु गर्दै आएको रहेको अनुसन्धानबाट खुलेको जानकारी दिए । उनका अनुसार अहिलेसम्म ति महिलाहरुले कुनै बच्चा चोरेको घटना जानकारीमा नआएकोले बच्चा चोर नै हो भनेर भन्न नमिल्ने भन्दै उनको साथबाट झारफुकमा प्रयोग हुने केही जडिबुटी, माला, पत्थरका ओठी लगायतका सामानहरु बरामद भएको बताए ।
अनुसन्धानको क्रममा उनीहरुले कुनै विरामी बच्चाहरुलाई झारफुक गर्ने, जडिबुटी दिने, राशीको औठी हो भन्नै पत्थरको औठी दिने र त्यसबाट १ सयदेखि २ सय रुपैयासम्म लिने गरेको पाइएको बताए । उनीहरु भारतको रक्सौल स्थित इस्लामपुरमा बस्दै आएपनि विगत तीन चार दिनदेखि वीरगंजको विभिन्न टोलहरुमा गई झारफुकको नाममा पैसा ठग्ने गरेको पाइएको प्रहरी नायब उपरीक्षक गिरीले बताए ।
उनका अनुसार ति महिलाहरु विरुद्ध कुनै किटानी जाहेरी पनि परेको छैन, बच्चा चोरी नै गरेको छ भन्ने प्रमाणित भएको छैन, बाहिरबाट आएकोले शंकास्पद लाग्नु स्वभाविक हो तर कुनै बच्चा चोरी भएको घटना पनि जानकारी नआएको बताए ।