उपचारमा लापरवाही गर्ने अस्पतालका संचालक र चिकित्सकलाई कारवाहीको माग गर्दै प्रदर्शन

• हरिशंकर शर्मा
वीरगंज (पर्सा), ५ भदौ / वीरगंज हेल्थ केयर अस्पतालले उपचारमा लापरवाही गरेको भन्दै बिरामीका आफन्तहरुले विरोध प्रदर्शनका साथै जिल्ला प्रशासन कार्यालयमा धर्ना दिएका छन् । पर्साको छिपहरमाई गाउँपालिका वडा नम्बर २ चेर्गाहा निवासी ३२ वर्षीय फिरोज मियाँ अन्सारीको उपचारमा लापरवाही गरेको वीरगंज हेल्थ केयर अस्पताल एवं चिकित्सकलाई काररवाहीको माग गर्दै विरोध प्रदर्शन गर्नुका साथै जिल्ला प्रशासन कार्यालय पर्सामा २ घण्टा धर्ना दिएका छन् ।
‘डा. आशिफ अन्सारीलाई पक्राउ गर, झोलाछाप डाक्टरलाई कारवाही गर’, ‘वीरगंज हेल्थकेयरका संचालक डा. अबुलहैसलाई कारवाही गर, वीरगंज हेल्थकेयर हस्पिटल मुर्दावाद’, ‘डाकटर होइन हत्यारा हो, डा. आशिफलाई जेल गर’ लगयतका नारायुक्त प्लेकार्ड बोकी आफन्तले वीरगंजको घण्टाघर स्थित विरोध प्रदर्शन गरेका हुन् । विरोध प्रदर्शन पश्चात उनीहरुले जिल्ला प्रशासन कार्यालय पर्सामा २ घण्टा धर्ना समेत दिएका छन् ।
पत्थरीबाट पीडित भई वीरगंज हेल्थकेयर अस्पतालमा भर्ना भएका छिपहरमाई निवासी ३२ वर्षीय फिरोज मियाँको गत साउन २६ गते डा. आशिफ अन्सारीले शल्यक्रिया गरेका थिए । डा. मियाँले गरेको पहिलो शल्यक्रिया असफल भएपछि दोस्रो शल्यक्रियाका क्रममा भित्रि नसा काटिएर अनियन्त्रित रक्तश्राव हुँदा विरामीको अवस्था चिन्ताजनक भएको स्थानीय नविन सिंहले जानकारी दिए ।
साधारण पत्थरीको शल्यक्रियाका लागि अस्पताल भर्ना भएका फिरोजलाई डा. आशिफ अन्सारीको चरम लापरवाहीले उनी अहिले मृत्यसँग लडि रहेको बताए । पत्थरीको शल्यक्रियामा खासै समस्या हुने नगरेको अवस्थामा डा. आशिफले दुई दुई पटक शल्यक्रिया गरेको र शल्यक्रियाको क्रममा नशा काटिदिएकोले रक्तश्राव अनियन्त्रित भएर विरामीको अवस्था चिन्ताजनक भएको उनको भनाई छ ।
यसबारे जिल्ला प्रहरी कार्यालयमा जाहेरी दिएको ४ दिनवितिक्यो तर प्रहरीद्वारा कुनै किसिमको कारवाही प्रक्रिया अगाडि बढाएको छैन, जबसम्म अस्पताल संचालक र चिकित्सकलाई कारवाही प्रक्रिया अगाडि नबढाए आन्दोलन जारी नै राख्ने उनको भनाई छ ।
यसैगरि पीडितका भाईले डा. आशिफ अन्सारीको चरम लापरवाहीको कारण दाई मृत्यसँग लडि रहेको आरोप लगाए । उनले साउन २६ गते पत्थरीको शल्यक्रिया गरेकोमा २४ घण्टासम्म रक्तश्राव भएकोमा पुनः दोश्रो पटक शल्यक्रिया गरेको त्यसबाट पनि ठीक नभएपछि ६ दिनसम्म भेण्डिलेटरमा राख्नुपर्छ भनेर ६ दिनसम्म सुधार हुन नसकेपछि काठमाडौं स्थित मेडिशिन असप्तालमा लैजानुपर्छ भनेपछि शल्यक्रिया विग्रिएको आफूहरुलाई जानकारी भएको बताए ।
पीडित पक्षले विगत १ हप्तादेखि अस्पतालका चिकित्सक एवं संचालकलाई कारवाही गर्न माग गर्दै आएका छन् । उनीहरुले तीन दिन अगाडि पत्रकार सम्मेल गरि पित्त थैलीमा रहेको पत्थरीको शल्यक्रिया गर्दा लापरवाही गर्ने जेनरल तथा लेप्रोस्कोपिक सर्जन डा. आशिफ अंसारी र अस्पतालका सञ्चालक डा. अबुल हैस अन्सारीलाई कारवाही गर्न दबाब दिदै आएका थिए तर हालसम्म प्रहरी प्रशासनले कुनै किसिमको कारवाही नगरेपछि विरोध प्रदर्शन गरेको आफन्तको भनाई छ ।
बिरामी फिरोजको स्वास्थ्य अवस्था चिन्ताजनक भएपछि अहिले काठमाण्डौको मेट्रोसिटी अस्पतालमा उपचार भइरहेको छ । सत्य कुरा नबताई ४ दिन सम्म भ्रममा राखेर परिवारका कुनै सदस्यलाई पनि विरामीलाई भेट्न नदिएको र दुई लाख पचास हजार रकम असुली गरि आईतबार राति ११ बजे अचानक तपाई आफ्नो विरामीलाई काठमाडौं लैजानुस् भन्दै डा.अंसारीले गैर जिम्मेवारी जवाफ दिएको विरामीका आफन्तको प्रतिक्रिया छ ।