लागुऔषध गाँजा सहित ट्याँकर र चालक पक्राउ

वीरगंज (पर्सा), ४ भदौ / पर्सा प्रहरीले तेल ट्याङ्करमा लागु औषध गाँजा बरामद गरेको छ । जिल्ला प्रहरी कार्यालयबाट खटिएको विशेष टोलीले वीरगंज महानगरपालिकाको वडा नं.२१ परवानीपुरबाट डब्लुबि ११ ई ९०३३ नम्बरको भारतिय ट्याङ्करबाट १७२ के.जी. लागु औषध गाँजा बरामद गरेको हो ।
शनिबार विहा ०२ः०० बजे वीरगञ्ज महानगरपालिका वडा नं.२१ परवानीपुरको बाटो हुँदै लागु औषध गाँजा ओसार पसार कार्य भैरहेको भन्ने प्राप्त सूचनाको अधारमा खटिएको टोलीलेवडा परवानीपुर सडकखण्डमा ट्याङ्करलाई रोकी जाँच गर्दा उक्त ट्याङ्करको तेल हाल्ने तेस्रो ट्याङ्की भित्र लुकाइछिपाइ राखेको अवस्थामा सानो ठुलो गरी ४६ पोका लागु औषध गाँजा फेला परेको जिल्ला प्रहरी कार्यालय पर्साले जनाएको छ ।
भारतको उत्तर प्रदेश जिल्ला गाजीपुर ग्राम सिहोरी वरठी निवासी वर्ष ३९ को ट्याङ्कर चालक लाल विहारी यादवलाई समेत पक्राउ गरिएको जिल्ला प्रहरी कार्यालय पर्साका प्रवक्ता प्रहरी नायब उपरिक्षक दिपक गिरीले वताए । उनलाई कानून बमोजिम नियन्त्रणमा लिई अवैध लागु औषध गाँजा र गाँजा बोक्ने प्रयोग भएको उल्लेखित नम्बरको ट्याङ्कर समेत बरामद गरी थप अनुसन्धान भइरहेको प्रवक्ता गिरीले जानकारी दिए ।