एमालेको ईसारामा राष्ट्रपति भण्डरीले नागरिकता फिर्ता गरेको कांग्रेसको आरोप

• मुस्कान श्रेष्ठ
वीरगंज (पर्सा), ३१ साउन / राष्ट्रपति विद्या देवी भण्डारीले संवैधानिक परम्परा मिचेको विरोधमा नेपाली कांग्रेस पर्साले आज वीरगंजमा विरोध प्रर्दशन गरेको छ । राष्ट्रपति भण्डारीले गत साउन २९ गते आईतबार पुनर्विचार आवश्यक रहेको भन्दै ९ पृष्ठको सन्देशसहित नागरिकता विधेयक प्रतिनिधि सभामा फिर्ता पठाउनुभएको थियो । सोही विरोधमा नेपाली कांग्रेस पर्साले विरोध प्रदर्शन गर्दै ¥याली निकालेका थिए ।
नेपाली कांग्रेस क्षेत्र नम्बर २ कार्य समिति पर्साका क्षेत्रीय सभापति महम्मद सहाबुद्दिनको नेतृत्वमा निकालिएको ¥याली नगर परिक्रमा गरी घण्टाघरमा आएर कोण सभामा परिणत भएको थियो । कोण सभालाई सम्बोध गर्दै नेपाली कांग्रेसका केन्द्रिय सदस्य एवम पूर्वमन्त्री अजय चौरसियाले केपी ओली नेतृत्वको सरकारको पालामा ल्याईएको नागरिकता विधेयक राष्ट्रपतिले पारित गरेको तर सोही विधेयक नेपाली कांग्रेस नेतृत्वको सरकारले ल्याउदा फिर्ता पठाएको भन्दै जनता माथि अन्याय भएको बताउनुभयो । एमालेको उक्साहटमा राष्ट्रपतिले गलत कदम चालेको पूर्वमन्त्री चौरसियाले आरोप लगाउनुभयो ।
यस्तै मधेश प्रदेशका उर्जा मन्त्री तथा नेपाली कांग्रेसका नेता ओम प्रकाश शर्माले राष्ट्रपति भण्डारीले मधेशी जनताको भावनाको खेल्वाड गरेको बताउनुभयो । राष्ट्रपति भण्डारी संविधान विरोधी प्रमाणित भएको उर्जा मन्त्री शर्माले बताउनुभयो । उहाँले फिर्ता पठाईएको नागरिकता विधेयकलाई पुनः राष्ट्रपतिका पठाउन सत्ता गठबन्धनमा आबद्ध दलहरुलाई आग्रह गर्नुभयो । कालो पट्टि बाधेर नेपाली कांग्रेसका नेता तथा कार्यकर्ताहरुले विरोध प्रदर्शन गरेका थिए ।