• मुस्कान श्रेष्ठ
वीरगंज (पर्सा), ३० साउन / वीरगंज महानगरपालिकाले नियन्त्रणमा लिएको ४ ट्रक युरिया मल कृषी समाग्री कम्पनीको जिम्मा लगाएको छ । सोमबार महानगरपालिकाको कार्यलयद्वारा आयोजित पत्रकार सम्मेलनमा वीरगंजका किसानलाई थप मल उपलब्ध गराउने ४ बुँदे सहमति भएपछि नियन्त्रणमा लिएको ४ ट्रक कृषी समाग्री कम्पनी लिमिटेड वीरगंजको जिम्मा लगाएको हो ।
महानगरका प्रमुख प्रशासकिय अधिकृत तथा कृषी सामाग्री लिमिटेडका प्रादेशिक प्रमुख चन्द्र चौलागाईद्वारा हस्ताक्षरित ४ बुँदे सहमति पत्रमा वीरगंजका कृषकहरुका लागि उपलब्ध गराईएको २ हजार ७ सय ७१ बोरा सहित थप ६ हजार बोरा युरिया मल उपलब्ध गराउने र यस कार्यमा महानगरपालिकाले समन्वय गर्ने उल्लेख गरिएको छ ।
यसैगरी कलकत्ताबाट आयात हुने मलमध्ये ४ हजार बोरा युरिया मल नयाँ प्रणाली माफर्त वीरगंज महानगरपालिकाको रोहवरमा कृषकहरुलाई उपलब्ध गराउने र सोको अनुगमन महानगरपालिकाले गर्ने सहमति भएको छ । साथै नियन्त्रणमा लिएको ट्रक कृषि समाग्री कम्पनी लिमिटेडको जिम्मा लगाउने र मल ढुवानीमा सहजीकरण गर्ने सहमति भएको कृषी समाग्री कम्पनी लिमिटेड वीरगंजका सूचना अधिकारी आलोक कुमारले जानकारुी दिनुभयो ।
ट्रक नियन्त्रण लिएको सन्दर्भमा वीरगंजका नगर प्रमुख राजेशमान सिंहले आफूले रोजेको बाटो गलत भएपनि कृषकहरुले केही राहत प्राप्त गरेको बताउनुभएको छ । मल समस्याको दिर्घकालीन समाधानका लागि राज्यले गम्भीर हुनुपर्ने बताउनुभयो ।
कृषी सामग्री लिमिटेडका प्रादेशिक प्रमुख चन्द्र चौलागाईले मल आयातका लागि सरकारले रुपैयाको आधारमा नभई नेपाललाई आवश्यक पर्ने मेट्रिक टनको आधारमा बजेट छुट्टाउनुपर्ने बताउनुभयो । उहाँले आगामी धान सिजनका लागि सरकारले बजेट विनियोजन लगायतका कार्यहरु आजबाटै सुरु गरे कृषकहरुको समस्या समाधान हुने बताउनुभयो । उहाँले मंगलबारदेखि मल वितरणका कार्यहरु सुरु हुने जानकारी दिनुभयो ।
केहि दिनअघि मात्र ग्लोबल टेण्डर मार्फत ओमानबाट ३० हजार मेट्रिक टन रसायनिक मल वीरगंज आईपुगेको थियो । आयात भएका मल अन्य जिल्लामा पठाउन थालेको भन्दै आईतबार कृषकहरुले ४ ट्रक मल नियन्त्रणमा लिएका थिए ।
प्रतिक्रिया दिनुहोस् !