• मुस्कान श्रेष्ठ
वीरगंज (पर्सा), १९ साउन / वीरगंजकी चर्चित महिला नेतृ रम्भा मिश्रा नेपाली कांग्रेसमा प्रवेश गरेकी छन् । बिहीबार प्रधानमन्त्री निवास बाल्वाटारमा नेपाली कांग्रेसका सभापति एवम प्रधानमन्त्री शेर बहादुर देउवाले उनलाई खादा ओढाएर पार्टीको सदस्यता प्रदान गरी स्वागत गरेका छन् । नेपाली कांग्रेसका केन्द्रिय सदस्य तथा पूर्व मन्त्री अजय चौरसियाको समन्वयमा मिश्रालाई सभापति देउवाले पार्टी प्रवेश गराएका हुन् ।
महिला नेतृ मिश्रा बिगतको राष्ट्रिय जनता पार्टी (राजपा) हालको लोकतान्त्रिक समाजवादी पार्टीमा सक्रिय रुपमा राजनीति गर्दै आएकी छन् । हालै सम्पन्न स्थानीय तहको निर्वाचनमा उनी लोसपाबाट उपमेयर पदको आकांक्षी थिईन । तर लोसपाले नेकपा एमालेसंग तालमेल गरी मेयर पदमा एमालेलाई सघाउने निर्णय भएको थियो । यसैगरी उपमेयर पदको उम्मेदवार लोसपाका जिल्ला अध्यक्ष पुरुषोत्तम लाल झालाई दिईएको थियो ।
महिलाको अधिकार हनन् गरेको प्रति असन्तुष्टि जनाउदै मिश्राले पार्टीबाट राजीनामा दिएकी थिईन् । स्वतन्त्र रुपमा उपमेयर पदको उम्मेदवार बेनकी मिश्राले ३ हजार ९ सय ९ मत ल्याएर चौथो स्थान प्राप्त गरिन् । महिला नेतृ रम्भा मिश्राले आफू प्रजातान्त्रिक विचारधाराको व्यक्ति भएको हुदाँ विगतमा पनि सोही विचारधारा पार्टीसंग आबद्ध भएको र अहिले नेपाली कांग्रेसमा प्रवेश गरेको बताएकी छन् । पार्टीलाई बलियो बनाउन लामो समयदेखि संघर्ष गर्दै आएपनि पार्टीले सहि मूल्यांकन गर्न नसकेको उनको भनाई छ ।
प्रतिक्रिया दिनुहोस् !