मुस्कान श्रेष्ठ
बीरगंज (पर्सा), ११ साउन / नेपाली कांग्रेसका केन्द्रिय सदस्य डा. शेखर कोइरालाले गठबन्धन भित्रको महागठबन्धनको कारण नेकपा माओवादी केन्द्रका अध्यक्ष पचण्डको महत्वकांक्षा बढी भएको बताएका छन् ।
प्रेस युनियन पर्साले वीरगंजस्थित नगर सभागृहमा आयोजना गरेको पत्रकार सम्मेलनलाई सम्बोधन गर्दै नेता कोइरालाले महागठबन्धन गर्न खोज्नुको कारण कांग्रेससंग बार्गेनिङ गर्न चाहेको बताएका हुन् ।
२०७४ सालको निर्वाचनमा माओवादीले बाम एकता गरेर पाएको सिट जस्तै आगामी निर्वाचनमा सिट बाडफाड गर्न नसकिने बताएका हुन् । उनले गत निर्वाचनमा एमालेसंग तालमेल नगरेको भए माओवादी कस्तो अवस्थामा पुथ्योे भनेर सहजै अनुमान लगाउन सकिने बताए । त्यस कारण माओवादीको चहाना अनुसारको नभई स्थानीय तहको निर्वाचनमा आफ्नो पार्टीले पाएको मतको आधारमा सिट बाडफाड हुने उनको भनाई छ ।
नेता कोइरालाले संवीधानमा संघीयता राखिएपनि कार्यान्वयन हुन नसकेको स्वीकार गरेका छन् । उनले संघीयता कार्यान्वयनमा आएको ५ वर्ष मात्रै भएको हुदाँ अहिलै असफल भएको भन्न नसकिने बताए । तर यस्तै अवस्थामा रहयो भने संघीयता धरापमा पर्ने नेता कोइरालाले बताए ।
उनले अंगीकृत नागरिकता भन्ने वित्तिकै दक्षीणतर्फ मात्रै हेर्न नहुने बताएका छन् । अंगीकृत नागरिकता सम्बन्धी विभिन्न मुलुकहरुमा छुटाछुटै प्रावधान रहेको भन्दै भारतमा ७ वर्षमा अंगिकृत नागरिकता दिने प्रावधानको विषयमा राजनीतिक दलहरुले गरिरहेको तर्क उचित नरहेको बताएका छन् ।
यसैगरी उनले सत्ता गठबन्धनमा आबद्ध दलहरुले आफूलाई नै सबैथोक ठानेको हुँदा स्थानीय निर्वाचनमा नेपाली कांग्रेस पहिलो पार्टी भएकोले आगामी निर्वाचनमा पनि कम क्षती हुने गरि तालमेल गर्ने नेता कोइरालाको भनाई छ । उनले आथिर्क तथा समाजिक रुपान्तरणमा तालमेल गर्ने पार्टीहरु बिच एउटै धारणा हुनुपर्ने भन्दै यसमा गठबन्धनमा आबद्ध दलहरु तयार छन कि छैनन् ? भनेर प्रश्न गरेका छन् ।
पार्टी भित्रको गुट उपगुटको चर्चा पाउने गरेको नेपाली कांग्रेसको आजको पत्रकार सम्मेलनमा समेत गुट उपगुट गन्ध देखिएको छ । पत्रकार सम्मेलनमा पार्टी सभापतिलगायत कांग्रेसका अन्य नेताहरुको अनुपस्थितिको सन्दर्भमा पत्रकारहरुले राखेको जिज्ञाशा नेता कोइरालाले आफूहरुले सबै आमन्त्रण गरेको तर कोई व्यक्ती आउने नआउने उनको आफ्नो इच्छाको विषय भएको बताएका थिए ।
प्रतिक्रिया दिनुहोस् !