• मुस्कान श्रेष्ठ
वीरगन्ज (पर्सा), ४ साउन / वीरगंजमा भाईरल रोगका बिरामीमा कोरोना संक्रमण पुष्टि भएको छ । वीरगंज स्थित नारायणी अस्पतालको प्रयोगशालामा ३४ जनाको पिसिआर परिक्षण गर्दा ६ जनामा संक्रमण पुष्टि भएको हो । सामान्य रुघाखोकी र ज्वरो लागेका बिरामीहरुमा कोरोनासंग मिल्दोजुल्दो लक्षण देखिएपछि चिकित्सकको आग्रहमा कोरोना परिक्षण गर्दा उक्त संख्यामा संक्रमण नारायणी अस्पतालका कोभिड संयोजक डा. उदय नारायण सिंहले जानकारी दिनुभयो ।
संक्रमीत हुने सबै महिला रहेका छन् । संक्रमित हुने मध्ये ५ जना वीरगंज र १ जा बारा जिल्ला स्थित कलैया उपमहानगरपालिकाका रहेका छन् । उनीहरुको उमेर समूह १८ देखि २४ वर्षको रहेको नारायणी अस्पतालका कोभिड संयोजक डा. सिंहले जानकारी दिनुभयो । डा. सिंहले गर्मी मौसममा भाईरल रोगका बिरामीहरुको संख्या बढेको बताउनुभयो । तर मौसमी रोग र कोरोनाको लक्षणहरु उस्तै–उस्तै रहेको कारण सावधानी अपनाउन आग्रह गर्नुभयो । मुलुकमा पछिल्लो समय कोरोना संक्रमणको ग्राफ बढ्दै गएको छ ।
डा. सिँहका अनुसार नागरिकले कोरोना विरुद्धको खोप लगाएपछि सामाजिक दुरी कायम गर्ने, स्यानीटाईजरको प्रयोग गर्ने लगायतका स्वास्थ्य मापदण्ड पालना गर्न छाडेका कारण बीरगंज लगायत देशैभर पुनः कोरोना संक्रमण फैलिदै गएको छ । हाल छिमेकी मुलुक भारतमा समेत कोरोना संक्रमण बढिरहेको कारण वीरगंज लगायत प्रमुख सिमानाकामा रहेका सहरका बासिन्दाहरुले उच्च सतकर्ता अपनाउनु पर्ने चिकित्सक सिंहले बताउनुभयो । स्वास्थ्य परिक्षण गराएका ३४ जना मध्ये ६ जनालाई संक्रमण भेटिएपछि अब वीरगंजमा कोरोना संक्रमण समुदायमा पुगि सकेको संकेत गरेको छ ।
प्रतिक्रिया दिनुहोस् !