वीरगन्ज (पर्सा), ३२ असार / ठाकुरराम बहुमुखी क्याम्पसको सेन्टर अन्यत्र सारिएको भन्दै विद्यार्थीहरुले क्याम्पसमा तोडफोड तथा आगजनी गरेका छन् । ठाकुरराम बहुमुखी क्याम्पसमा अध्ययनरत स्नातक दोश्रो वर्षको परीक्षा केन्द्र सोही क्याम्पसमा नदिई अन्यत्र दिएको भन्दै विद्यार्थीहरुले तोडफोड तथा आगजनी गरेका हुन् ।
उनीहरुले परीक्षा केन्द्र वीरगन्ज भन्दा बाहिर तोकिएको भन्दै शनिबार विहान क्याम्पसमा तोडफोड गर्दै आगजनी गरेका हुन् । विधार्थीहरुको एक समूहले क्याम्पस प्रमुखको कार्यकक्षभित्र र बाहिर तोडफोड गर्दै फर्निचरहरुमा आगजनी गरेका हुन् । प्रदर्शनमा उत्रिएका विधार्थीहरुले क्याम्पसको टेबुल, कुर्सी, बेन्च र सोफा बाहिर निकालेर आगजनी समेत गरेका छन् । विरोध र आगजनीको कारण केही समय विद्यार्थी र प्रहरीबीच भएको झडपले उक्त क्षेत्र तनावग्रस्त बनेको थियो । परीक्षाकेन्द्र, अध्यनरत क्यामपसमा नताकेसम्म आन्दोलन जारी रहने चेतावनी समेत विद्यार्थीहरुले चेतावनी समेत दिएका छन् ।
ठाकुरराम बहुमुखी क्याम्पसको तीन वर्षे बीएडको परीक्षा सेन्टर सर्लाहीको लालबन्दी स्थित जनज्योति बहुमुखी क्याम्पसमा र चार वर्षे बीएडको परीक्षा बाराको कलैया स्थित रामराजा शाह बहुमुखी क्याम्पसमा तोकिएपछि आफूहरु विरोध गर्न बाध्य भएको विद्यार्थी नेता पवन यादवले बताए ।
क्याम्पस प्रमुख उमेश चौरसीयाले परीक्षा सेन्टर अन्यत्र सारिएकोले क्याम्पसमा तोडफोड र आगजनीका घटना हुनु निन्दनीय भएको बताए । परीक्षा केन्द्र क्याम्पस प्रमुखले नभइ त्रिभुवन विश्वविधालयको राष्ट्रिय परीक्षा बोर्डले तोक्ने प्रावधान भएकाले अध्यनरत शिक्षण संस्थामै क्षति पुर्याउनु दूर्भाग्य भएको उनको भनाइ छ ।
प्रतिक्रिया दिनुहोस् !