• मुस्कान श्रेष्ठ
वीरगन्ज (पर्सा), १५ असार / अनौपचारीक क्षेत्र सेवा केन्द्र (ईन्सेक) पर्साको नेपाल मानव अधिकार वर्ष पुस्तक २०२३ को अर्धवार्षिक पूर्व प्रकाशन समिक्षा गोष्ठी आज सम्पन्न भएको छ ।
वीरगंज स्थित होटल कुमु प्यालेसमा सम्पन्न कार्यक्रममा पर्साका प्रमुख जिल्ला अधिकारी उमेश कुमार ढकालले पर्सामा लागुऔषधका घटनाहरु बढ्दै गएको बताउनु भएको छ । उहाँले युवाहरु लागुऔषध प्रति आकर्षित हुदैँ गएको विषय निकै गम्भीर रहेको भन्दै यसलाई निरुत्साहित पार्न आफू विभिन्न संघ संस्थाहरुसंग नियमित छलफलमा रहेको बताउनुभयो । जिल्ला प्रशासन कार्यलयमा थुप्रै सामाजिक घटनाहरु आउने गरेको र त्यस्ता घटनाले समाजको वास्तविक चित्रण गर्ने कुरामा प्रमुख जिल्ला अधिकारी ढकालले जोड दिनुभयो । उँहाले विभिन्न जनचेतनामुलककार्यक्रम तथा संचारमाध्यमहरु मर्फत बोक्सीको अरोप लगाई महिला माथि हिंसा गर्नु कानुनी अपराध भएको जानकारी दिदा समेत अहिले पनि महिलालाई बोक्सीको आरोप लगाउने गरेको विषय दुखद रहेको बताउनुभयो ।
पर्सा प्रहरी उपरीक्षक रमेश बस्नेतले कुनै पनि समाज अपराधिक गतिविधि रहित सृजना हुन नसक्ने बताउनुभएको छ । उँहाले १६–१७ वर्षको उमेरमा किशोर किशोरीहरु भागेर बिहे गर्ने गरेको र अभिभावकले सो विवाहलाई आधिकारीक नमान्दा उक्त घटना बलात्कारमा परिणत हुने गरेको बताउनु भएको छ । प्रहरी उपरीक्षक बस्नेतले सरकारले महिलाको स्वास्थ्य प्रजननलाई प्राथमिकतामा राखी विवाह गर्ने उमेर २० वर्ष तोकेकोले पनि बलात्कारका घटनामा वृद्धि भएको हुनसक्नेमा जोड दिनु भयो । वीरगंज युवा समाजका अध्यक्ष कमल चौगाईले अहिले पनि समाजमा बाल श्रम र बालविवाहका घटनाहरुमा कमी आउन नसकेकोमा चिन्ता ब्यक्त गर्नु भयो ।
ईन्सेकले ६ महिनाको अवधिमा पर्सा मानव अधिकार उल्लंघन भएको घटना सम्बन्धी विवरण सार्वजनिक गरेको छ । जसमध्ये बलात्कारबाट १ देखी १८ वर्ष उमेरका ८ जना र १८ वर्षदेखी माथिका १ जना पिडीत भएको तथ्यांक रहेको छ । यसैगरी बलात्कार प्रयासको १ देखि १८ वर्षका २ जना र सोभन्दा बढी उमेरका २ जना गरी ४ जना पिडीत रहेका छन् । बहुविवाहको ९, हत्याको ५, मानव बेचविखनका ३, कुटपिटका २ र बोक्सी अरोपको १ गरी ३४ वटा घटनाको तत्यांक रहेको ईन्सेक पर्साका प्रतिनिधि केसी लामिछानेले बताउनुभयो ।
कार्यक्रममा सहभागिहरुले नागरिकता सम्बन्धी समस्या, बाल श्रम विषयमा समेत ध्यानाकर्षण गराएका थिए ।
प्रतिक्रिया दिनुहोस् !