वीरगन्ज / मानव बेचबिखन विरुद्ध एकाई टोली (एएचटियु) ले विश्व बालश्रम विरुद्ध दिवसको अवसरमा जागरण अभियान सञ्चालन गरेको छ । मानव बेचबिखन विरुद्ध इकाइ क्षेत्रीय मुख्यालय (बेतिया सशस्त्र सीमा बल कार्यालय ४७ औँ वाहिनी रक्सौल) रेलवे स्टेशन क्षेत्रमा बालश्रम विरुद्ध दिवसको अवसरमा सचेतना फैलाइएको हो ।
गैरसरकारी संस्था प्रयास उपकेन्द्र रक्सौल, चाइल्ड लाइन रेलवे रक्सौल, रेलवे सुरक्षा बल रक्सौल, सरकारी रेलवे बल रक्सौलको सहयोगमा सयुँक्त रुपमा बालश्रम सम्बन्धमा सचेत गराइएको इन्स्पेक्टर मनोज कुमार शर्माले जानकारी दिए । देशको भविष्य बनाउने बालबालिकाहरुलाई श्रममा नलगाई उचित हेरचाह र शिक्षा एवम् पालनपोषण गर्नुपर्नेमा शर्माले जोड दिए । बालबालिकालाई श्रममा प्रयोग गरे देशको बिकास सम्भव नहुने उनले बताए । सोही अवसरमा रक्सौल स्थित रेलवे स्टेसनमा रहेका पसलेहरुले बालश्रम नगर्ने र गराउन नदिने प्रतिबद्धता पनि जनाएका छन् ।
प्रयास उपकेन्द्रकी आरती कुमारीले आफ्नो संस्थामार्फत उपलब्ध गराइने कानुनी सुविधाका बारेमा सबैलाई जानकारी दिँदै बाल श्रम आजको सबैभन्दा ठूलो अपराध भएको बताइन् । यही अपराधको नियन्त्रणका लागि सबैलाई हातेमालो गर्न पनि उनले आग्रह गरेकी छिन् । सचेतना अभियानमा इन्स्पेक्टर मनोज के. शर्मा, महिला हवल्दार कल्पना बाजपेयी, महिला हवल्दार रेश्मा कुमारी, रेलवे पुलिस बल, आरपीएफ इन्स्पेक्टर ऋतुराज कश्यप, आरती कुमारी, किशोर सबसेन्टर रक्सौलका विजय शर्मा, चाइल्ड लाईनका अजय कुमार सिंह, अभिषेक कुमार सिंह लगायतको उपस्थिति रहेको थियो ।
प्रतिक्रिया दिनुहोस् !