• मुस्कान श्रेष्ठ
वीरगन्ज / वीरगंज महानगरपालिका वडा नम्बर १० स्थित भाजुरत्न कम्पनीले सर्वसाधारणका लागि निःशुल्क शौचालय संचालनमा ल्याएको छ । ग्रिनी सिटी सामुदायीक प्रहरी सेवा केन्द्र आर्दशनगरको पहलमा भाजुरत्न कम्पनीले आईतबार बाट निःशुल्क रुपमा शौचालय संचालनमा ल्याएको हो ।
मुलुकको राजधानी काठमाण्डौँ महानगरपालिकामा मेयर बालेन्द्र साहको अनुरोधमा होटेल तथा रेस्टुरेण्टले निःशुल्क शौचालयको व्यवस्था गरेपछि वीरगंजमा समेत आम सर्वसाधारणका लागि निःशुल्क शौचालयको व्यवस्था गर्ने सुरुवात भएको छ ।
मधेश प्रदेशको एक मात्र महानगरपालिकामा सार्वजनिक शौचालयको अभावका कारण सर्वसाधारणहरुलाई सास्ती हुने गरेको भन्दै उँहाहरुको सहजताको लागि आफूहरुले निःशुल्क शौचालयको व्यवस्था गरेको भाजुरत्न कम्पनीद्वारा सन्चालित होन्डा मोटरसाइकल सोरुमका ब्रान्च मेनेजर मोहन कुमार श्रेष्ठले जानकारी दिनुभयो ।
ग्रिनी सिटी सामुदायीक प्रहरी सेवा केन्द्र आर्दशनगरका अध्यक्ष जय प्रकाश खेतानले वीरगंजमा शौचालयको अभावलाई मध्य नजर गर्दै भाजुरत्न कम्पनीले गरेको कार्य अति सराहनीय बताउनुभयो । काठमाण्डौँमा सर्वसाधारणहरुका लागि होटेल तथा रेस्टुरेण्टहरुले निःशुल्क शौचालयको व्यवस्था गरेझँै वीरगंजका रेस्टुरेण्टहरुले पनि गर्नुपर्ने बताउनुभयो ।
प्रतिक्रिया दिनुहोस् !