वीरगन्जमा दुईदिने बृहत शैक्षिक मेलाको आयोजना गरिने

वीरगन्ज (पर्सा), २६ जेठ / वीरगन्जमा यही जेठ २७ र २८ गते बृहत शैक्षिक मेलाको आयोजना गरिने भएको छ । कृष्ण फाउण्डेशनको आयोजनामा यही जेठ २७ र २८ गते वीरगन्जको लर्डस दियालोमा २ दिने वृहत्त शैक्षिक मेलाको आयोजना गरिने भएको हो ।
वीरगन्जमा पत्रकार सम्मेलनको आयोजना गर्दै आयोजकले भारतमा उच्च शिक्षा लिने चाहाने विद्यार्थीहरूलाई मध्यनजर गर्दै शैक्षिक मेलाको आयोजना गर्न लागिएको जानकारी दिएको छ । भारत सरकारद्वारा मान्यता प्राप्त कलेजहरुमा २५ प्रतिशतदेखि शतप्रतिशत छात्रवृतिमा अध्ययन गर्न इच्छुक विद्यार्थीहरुलाई मध्यनजर गर्दै शैक्षिक मेला हुन लागेको कृष्ण फाउण्डेशनका निर्देशक सुजित कुमार कर्णले जानकारी दिए ।
दुई दिनसम्म चल्ने मेलामा भारतका विभिन्न किसिमका ख्याति प्राप्त विश्वविद्यालय, एवम् कलेजहरुका शिक्षकहरुले नै विद्यार्थीलाई निःशूल्क रुपमा परामर्श दिने निर्देशक कर्णले बताए । दुई दिनसम्म चल्ने मेलामा करिब ४ हजार विद्यार्थीहरुले परामर्श लिने उनले बताए । विहानको ९ बजेदेखि साँझको ६ बजेसम्म दुई दिनमा ४ हजारको अनुपातमा विद्यार्थीहरुले मेलाको अवलोकन गर्ने आयोजक सँस्थाले लक्ष्य लिएको छ ।
उक्त मेलामा भिआईटि भेल्वर, एसआईएम युनिभर्सिटि, जैन युनिभर्सिटि बेङ्लोर, भिग्नानस् युनिभर्सिटि, सिम्बोसीस् युनिभर्सिटि, आन्द्रा युनिभर्सिटि, सारदा युनिभर्सिटि, कर्नाटक कलेज, आर आर इन्स्ट्च्यिुट एसभीसेट, उत्तराञ्चल युनिभर्सिटि लगायतका कलेजहरुको सहभागिता रहने आयोजक सँस्थाले जनाएको छ ।
पत्रकार सम्मेलनमा नेपाल पत्रकार महासंघ पर्साका अध्यक्ष अनुप तिवारी, जैन युनिभरसिटिका प्रतिनिधि आरके शर्मा लगायत सहभागी थिए ।