छिपहरमाई गापा : वडा नं. २ मतगणनामा धाँधली भएको भन्दै पुनः मतदान गर्न माग

• हरिशंकर शर्मा
वीरगन्ज (पर्सा), २ जेठ / पर्साको छिपहरमाई गाउँपालिका अध्यक्षका उम्मेदवार नविन सिंहले वडा नं. २ स्थित चेरगाहा मतदान केन्द्रको पुनः मतदान हुनुपर्ने माग गरेका छन् । नेपाली काँग्रेस पार्टीबाट अध्यक्ष पदमा उम्मेदवारी दिएका सिंहले छिपहरमाइ गाँउपालिका वडा नम्बर २ को चेरगाहा मतदान केन्द्रमा धाँधली भएको भन्दै मतदान रद्द गरेर पुनः मतदान गर्नुपर्ने माग गरेका हुन् । मतदान र मतगणना दुवैमा धाधली गरिएको भन्दै काँग्रेसले विरोध गरेपछि छिपहरमाइ गाँउपालिकाको मतगणना कार्य आइतबार दिउसो २ बजे देखि रोकिएको छ ।
वीरगन्जमा आयोजित पत्रकार सम्मेलनमा बोल्दै नेपाली काँग्रेसका जिल्ला सह सचिव समेत रहेका सिंहले पालिकाका नि. प्रमुख प्रशासकीय अधिकृत शम्भु साह र कम्प्युटर अपरेटर संजिव यादवको शंकास्पद कार्यले मतगणनामा विवाद उत्पन्न भई मतगणना रोकिएको हो, रोकिएको मतगणनालाई रद्द गरि पुनः मतदान गर्नुपर्ने माग गरे । मतदान र मतगणना दुवैमा निवर्तमान गाँउपालिका अध्यक्ष एंव नेकपा एमालेका अध्यक्ष मनोज गुप्ताले धाधली गरेको उनको आरोप छ ।
निवर्तमान अध्यक्ष गुप्ताले नियुक्ति गरेको करारका कर्मचारीहरुलाई मतदान र मतगणनामा खटाई मृत्यु भइसकेका र विदेश रहेका व्यक्तिहरुको नाममा २० वटा बढि मतदान गर्न लगाएको उनको आरोप छ । वडा नं. २ मा १६३४ मतदाताहरु रहेकोमा १६५४ भोट खसेपछि निवर्तमान अध्यक्ष मनोज गुप्ताद्वारा संचालित कर्मचारीहरुले गरेको धाँधलीको पर्दाफास भएपछि विवाद उत्पन्न भई मतगणना कार्य रोकिएको थियो ।
गुप्ताको निर्देशनमा गाँउपालिका निमित्त प्रमुख प्रशासकीय अधिकृत समेत रहेका सहायक मतदान अधिकृत शम्भु साहले १५९० मत खसेको भएपनि इन्ट्रि भने १६२० मतको गराएर मुचुल्का उठाएको आरोप सिंहको छ । यस कार्यमा सहायक निर्वाचन अधिकृतको मिलोमतो मात्रै नभई कम्प्युटर अपरेटर संजिव यादवको पनि मिलोमतो रहेको उनको भनाई छ । निर्वाचन आयोगमा तथ्याँक टिपाउने कम्प्युटर अपरेटर यादवको काम हो, र उनले १५९० मतको ठाउँमा १६२० मत टिपाएको सिंहले बताए ।
यसका साथै एमाले उम्मेदवार गुप्ताले मृत्यु भइसकेका मतदाताको नाममा पनि मत खसाउन लगाएको र त्यसको प्रमाण पनि आफुसंग सुरक्षित रहेको सिंहको भनाई छ । त्यहि बेला आफुहरुले विरोध गर्दा पनि कुनै सुनुवाइ नभएको भन्दै सिंहले अहिले मतगाणनाका क्रममा पनि गुप्ताले करारमा नियुक्त गरेका कर्मचारीहरुले धाधली गरेपछि आफुहरुले आइतबार देखि मतगणना रोक्न लगाएको बताए ।
उनले मतदान र मतगणनामा धाधली गर्ने कर्मचारीलाई तत्काल पक्राउ गरि कानूनी कार्वाहीको दायरामा ल्याउन स्थानीय प्रशासनसंग माग पनि गरे । आइतबार मतगणना रोकेपछि निर्वाचन अधिकृत निरौलासँग बुझ्दा मतगणनामा खटेका कर्मचारीहरुको कार्यप्रति शंकास्पद देखिएकोले तत्कालको लागि मतगणना कार्य रोकिएको र अर्को कर्मचारी आएमात्रै मतगणना कार्य शुरु हुने बताएका थिए ।