• मुस्कान श्रेष्ठ
वीरगंज, २० वैशाख / स्थानीय निकायको निर्वाचन नजिकिदै गर्दा पर्सा जिल्लामा मतदाता शिक्षा कार्यक्रम समयमा संचालनमा नआउँदा मत बदरको संख्या बढ्ने सम्भावना देखिएको छ ।
निर्वाचन आउन १० दिन मात्र बाँकी रहँदा मतदाता शिक्षा कार्यक्रम नहुँदा नँया मतदाताहरु मतदान कसरी गर्ने भन्ने विषयमा अन्यौलमा परेका छन् । बिगतमा निर्वाचन हुनु १५÷२० दिन अघि टोलटोलमा पुगेर मतदाता शिक्षा कार्यक्रम हुने गर्दथ्यो तर यसपटक सो कार्यक्रम नहुनुले पर्सा जिल्लामा मत बदरको संख्या बढ्न सक्ने देखिएको छ ।
पर्सामा महिला १ लाख ४८ हजार २ सय ८३, पुरुष १ लाख ९१ हजार ५ सय ३७ र अन्य १६ जना गरी कुल मतदाता संख्या ३ लाख ३९ हजार ८ सय ३६ रहेको छ । नँया मतदाताको संख्या भने ५९ हजारको हाराहारीमा रहेको छ । निर्वाचन आयोगले बिगत जस्तै यसपटक घरदैलो मतदाता शिक्षा अभियान नहुने बताएको छ ।
२०७४ को पालिकाको निर्वाचनमा मतदाता शिक्षाका लागि देशभर २० हजार स्वयमसेवक परिचालन गरेको थियो भने ८० करोड खर्च भएको थियो । करोडौँ खर्चेर पनि बिगतको निर्वाचनमा मत बदर घटाउन नसकेको भन्दै आयोगले प्रविधिमैत्री युगमा रेडियो, टेलिभिजन, अनलाईन, सामाजिक संजालबाट मतदाता शिक्षालाई प्राथमिकतामा राखेको छ । तर पर्सा जिल्लाका अधिकांश पालिकाबासीहरु प्रविधिको पहुचबाट बाहिर छ्न ।
वीरगंज महानगरपालिकामा ३२ वटा वडा मध्य १६ वटा ग्रामीण भेग नै छन् । यता राजनीतिक दलहरु पनि मतदाता शिक्षा कार्यक्रमप्रति उती गम्भीर देखिदैन् । निर्वाचनमा मतदातासंग मत माग्नुको साथै मतदान कसरी गर्ने शिक्षा पनि संचालन गरे मत बदरको संख्यामा केही कमी आउन सक्ने थियो ।
यता जिल्ला निर्वाचन कार्यलय पर्साकी निर्वाचन अधिकृत रंजीता झाले बिगतमा २० दिन अघिबाट मतदाता शिक्षा अभयान संचालन हुँदा निर्वाचन आउने बेलासम्ममा मतदाताहरु मतदान गर्ने तरिका बिसर्ने गरेकोले यसपटक फरक तरिका अप्नाएको बताउनुभयो ।
उँहाले निर्वाचनको २ दिन अघि वैशाख २८ र २९ गते १४ पालिकाको प्रत्येक मतदान केन्द्रमा मतदाता शिक्षा कक्ष निर्माण गरि स्वयमसेवक खटाएर मदतादाहरुले परिचयपत्र लिन आउने बेलामा शिक्षा दिने बताउनुभयो । यसले मतदाताहरुलाई मतदान गर्न सहज पनि हुने र मत बदरको संख्यामा पनि कमी आउने बताउनुभयो ।
उँहाले यस विषयमा निर्वाचन आयोग मात्र नभई उम्मेदवारहरु पनि जिम्मेवार भएर लाग्नुपर्ने बताउनुभयो ।
प्रतिक्रिया दिनुहोस् !