• हरिशंकर शर्मा
वीरगन्ज, ३० चैत / नेकपा माओवादी केन्द्र पर्साले आफ्नै पार्टीका वीरगन्ज महानगर कमिटि अध्यक्ष रहबर अन्सारीलाई पार्टीको सधारण सदस्य समेत नरहने गरि निष्काशन गरेको छ । वीरगन्ज स्थित पार्टी कार्यालयमा बुधबार भएको तोडफोड घटनामा संलग्न रहेको भन्दै नेपाल कम्युनिष्ट पार्टी (माओवादी केन्द्र) जिल्ला समिन्वय समिति पर्साले महानगर अध्यक्ष अन्सारी सहित उपाध्यक्षद्वय अनुरुद्ध यादव र जुम्मादिन अन्सारीलाई पनि पार्टीबाट निष्काशन गरेको हो ।
नेकपा माओवादी केन्द्रले बुधबार नै विज्ञप्ति जारी गरि तीनैजनालाई पार्टीबाट निष्काशन गरेको हो । नेपाल कम्युनिष्ट पार्टी (माओवादी केन्द्र) जिल्ला समन्वय समिति पर्साका संयोजक रामदरश कुशवाहा एवं इन्चार्ज विजय महतोद्वारा हस्ताक्षर गरि जारी गरिएको विज्ञप्तिमा महानगर अध्यक्ष अन्सारी, उपाध्यक्षद्वय यादव र अन्सारीलाई पार्टीको साधरण सदस्य नरहने गरी निष्काशन गरिएको उल्लेख छ ।
महानगर अध्यक्ष अन्सारी लगायतको समूहले देशी–विदेशी प्रतिक्रियावादीहरुको इशारामा पार्टी कार्यालयमा तोडफोड गरि जिल्ला इन्चार्ज र संयोजकलाई तथानाम गाली गलौज गरी पार्टीलाई बदनाम गराएको विज्ञप्तिमा उल्लेख छ । स्थानीय निर्वाचनमा समेत पार्टीलाई हानी पु¥याउने गरी गुण्डागर्दी र अराजक गतिविधि गर्ने र गराउने अन्सारीसहितका नेताहरुलाई पार्टीबाट निष्काशन गरिएको विज्ञप्तिमा उल्लेख छ ।
वीरगन्जको राधेमाई स्थित माओवादीको पार्टी कार्यालयमा बुधबार दिउँसो असन्तुष्ट नेता कार्यकर्ताहरुको एक समूहले तोडफोड गरेका थिए । जिल्ला नेतृत्वबाट असन्तुष्ट अखिल क्रान्तिकारीका मधेस प्रदेश प्रमुख सचिव जुवेर आलम, माओवादी केन्द्रका वीरगन्ज महानगर उपाध्यक्षद्वय अनिरुद्ध यादव र जुमादीन अन्सारी, वडा कमिटी अध्यक्ष हीरा अन्सारी, छोटेलाल कुर्मी लगायतको समूहले पार्टी कार्यालयमा तोडफोड गरेको जिल्ला इन्चार्ज विजय महतोको आरोप छ । स्थानीय तह निर्वाचनका लागि पार्टीले गठन गरेको जिल्ला समन्वय समितिको गतिविधि प्रति असन्तुष्टि जनाउँदै पार्टी कार्यालयमा ज्ञापनपत्र पत्र बुझाउन गएका नेता तथा कार्यकर्ताहरुको समूहले विवाद भएपछि तोडफोड गरेका थिए ।
तोडफोडबाट पार्टी कार्यलयमा रहेको टेबल, कुर्सी, सोफा लगायतका सामानहरुमा क्षति भएको छ । आसन्न स्थानीय तहको निर्वाचनमा पार्टीको तर्फबाट वीरगन्ज महानगरको मेयरका आंकाक्षी थिए अन्सारी । उनी २०७४ को निर्वाचनमा पनि माओवादी केन्द्रको तर्फबाट उम्मेदवार बनेका थिए ।
यसैगरि नेपाल कम्युनिष्ट पार्टी (माओवादी केन्द्र) वीरगन्ज महानगर अध्यक्ष रहबर अन्सारीले आफूमाथि झुठा आरोप लगाएको बताएका छन् । अन्सारीले विज्ञप्ति जारी गरि जिल्ला कार्यालयमा भएको तोडफोड एवं जिल्ला नेतृत्वलाई गाली गलौंज गरेको भन्ने आफूमाथि लागेको आरोपप्रति गम्भिर ध्यानाकर्षण भएको जनाएका छन् । उनले जारी गरेको विज्ञप्तिमा आफू लगायत उपाध्यक्षद्वय अनिरुद्ध यादव र जुमाद्दिन अन्सारीलाई साधारण सदस्य समेत नरहने गरि पार्टीबाट निष्काशन गरेको भ्रम फिजाउने जिल्ला इन्चार्ज विजय महतो र रामदरस कुशवाहाद्वारा हस्ताक्षर गरि जारी गरि पार्टीको लेटरप्याडको दुरुपयोग गरि निकालिएको विज्ञप्तिप्रति गम्भिर ध्यानाकर्षण भएको उल्लेख गरिएको छ ।
विज्ञप्तिमा झुठा र कपोकल्पित भ्रामक आरोप सहितको विज्ञप्ति आफैमा पुर्वाग्राही छ । यस्तो खाले गतिविधि आफैमा सांगठनिक अराजकताको प्रमाण पनि हो । महानगर पार्टी अध्यक्ष र पदाधिकारीलाई आवश्यक पर्दा कारवाही गर्ने अधिकार पार्टीको प्रदेश समितिको सिफारिसमा केन्द्रिय समितिलाई मात्र छ, तसर्थ यस्तो खालको गैर राजनीतिक हर्कतबाट विचलित नहुन सिंगो महानगर समिति, पार्टीका सदस्यहरु, समर्थक र शुभचिन्तकहरुमा हार्दिक अनुरोध समेत गरिएको उल्लेख छ ।
प्रतिक्रिया दिनुहोस् !