वीरगन्ज, २६ चैत / नेकपा माओवादी केन्द्र पकहामैनपुर गाउँपालिका कमिटिका अध्यक्ष सुरेश मेहता सहित दुईसय भन्दा बढि नेता तथा कार्यकर्ताहरुले नेपाली काँग्रेसमा प्रवेश गरेका छन् । शुक्रबार पर्साको पकाहामैनपुर गाउँपालिका वडा नं. २ मधुवनीमा शुक्रबार आयोजित नेपाली काँग्रेसको बृहत पार्टी प्रवेश कार्यक्रममा विभिन्न पार्टी परित्याग गरि मेहता सहित दुई सय जना भन्दा बढि नेता तथा कार्यकर्ताहरु नेपाली काँग्रेसमा प्रवेश गरेका छन् ।
गत बर्षको निर्वाचनमा माओवादीबाट गाउँपालिका अध्यक्षमा चुनाव लडेका मेहता गाउँपालिका अध्यक्ष विजय चौरसियाबाट झिनो मतान्तरले पराजित भएका थिए । अगामी निर्वाचनमा नेपाली काँग्रेसबाट चुनाव लड्ने मेहताको तयारी छ । मेहतासँगै जनता समाजवादी पार्टी पकहामैनपुर गाउँपालिका समितिका अध्यक्ष विनोद मेहता, माओवादी गाउँपालिका कमिटिका सचिव संजय चौहान, लतिफ मियाँ, साविक गाविस सुर्जाहाका पूर्व गाविस अध्यक्ष शिवनाथ महतो, विन्दुभुषण साह लगायतकाले पार्टी प्रबेश गरेका हुन् । गत बर्षको निर्वाचनमा तत्कालिन संघिय समाजवादी फोरमबाट विनोद मेहता वडाध्यक्षमा चुनाव लडेका थिए ।
यसैगरी सोही कार्यक्रममा पोखरिया नगरपालिका वडा नं. ६ श्रीसियाका वडाध्यक्ष सियानन्द प्रसाद चौहान पनि पार्टी प्रबेश गरेको नेपाली कांग्रेस पर्सा क्षेत्र नं. ३ का सभापति श्रीकिशुन चौहानले जानकारी दिए । वडाध्यक्ष चौहान संगै चानजित बैठा, इनरदेव यादव, शिवनारायण यादव, संतोष यादव, हरि राम, बिरेन्द्र महतो, अवधेश साह, अमरदेव राम लगायतकाले एक सय जनाले प्रबेश गरेको सभापति चौहानले वताए ।
पकहा मैनपुर गाउँपालिका समितिका अध्यक्ष हरि चौहानको अध्यक्षतामा भएको कार्यक्रममा नवप्रबेशी सबै जनालाई नेपाली कांग्रेसका केन्द्रिय सदस्य अजय चौरसिया, पूर्व केन्द्रिय सदस्य सुरेन्द्र चौधरी, जिल्ला सभापति जनार्दन सिंह क्षेत्री, मधेश प्रदेशका खानेपानी तथा उर्जा बिकास मन्त्री ओमप्रकाश शर्मा, नेपाली कांग्रेस पर्सा उपसभापतिद्वय रामनारायण कुर्मी, अशोक कुमार गुप्ता, प्रवक्ता रमेश पाण्डे लगायतकाले फुल माला र अविरको टिका लगाएर पार्टीमा स्वागत गरेका थिए भने कार्यक्रमको संचालन जिल्ला सदस्य ललन द्विवेदीले गरेका थिए ।
प्रतिक्रिया दिनुहोस् !