सशस्त्र प्रहरीद्वारा ठूलो परिमाणमा तस्करीको सामान सहित २ वटा ट्रक नियन्त्रणमा

  • हरिशंकर शर्मा
वीरगन्ज, २३ चैत । सशस्त्र प्रहरी पर्साले वीरगंजबाट एकै दिन करिब डेढ करोड मुल्य बराबरको तस्करीको सामान सहित दुईवटा ट्रक नियन्त्रणमा लिएको छ ।
सशस्त्र प्रहरी बल १३ नम्बर गण हेड क्वार्टर पर्साबाट खटिएको सशस्त्र प्रहरी टोलीले वीरगन्जबाट मालसामान लिएर पथलैयातर्फ जाँदै गरेको अवस्थामा वीरगन्ज महानगरपालिका वडा नं. १४ गण्डक सडक खण्डबाट २ वटा ट्रक नियन्त्रणमा लिएको हो । विशेष सूचनाको आधारमा खटिएको सशस्त्र प्रहरीको टोलीले गण्डक चोक स्थितबाट ना २ ख ९५४३ र ना ७ ख ९४२ नम्बरको दुवै ट्रक रोकेर चेकजाँच गर्दा करिब डेढ करोड मूल्य बराबरको तस्करीको सामान फेला परेको सशस्त्र प्रहरी बल १३ नम्बर गण हेड क्वाटर पर्साले जनाएको छ ।
चेकजाँचको क्रममा ना २ ख ९५४३ नम्बरको ट्रकबाट भन्सार प्रज्ञापनपत्र नभएको मेडिकल उपकरण, औषधी र अन्य खुद्रा सामान गरि ९४ लाख ५३ हजार ५८ रुपैया मुल्य बराबरको सामान बरामद भएको थियो भने ना ७ ख ९४२ नम्बरको ट्रकमा भन्सार प्रज्ञापनपत्र नभएको ५१ लाख ९२ हजार ६ सय १७ रुपैया मुल्यको कपडा र अन्य सामान फेला परेको थियो । दुवै ट्रकबाट एक करोड ४६ लाख ४५ हजार ६ सय ७५ रुपैया मुल्यको सामान बरामद भएको थियो ।
बरामद सामन र दुवै ट्रकको २५÷२५ लाख गरि जम्मा एक करोड ९६ लाख ४५ हजार ६ सय ७५ रुपैयाँ मुल्यकाँन गरि आवश्यक कारबाहीको लागि राजश्व अनुसन्धान कार्यालय पथलैयामा पठाइएको बताइएको छ ।
यसैगरि सशस्त्र प्रहरीले माघ, फागुन र चैत गरि तीन महिनाको अवधिमा छ करोड २० लाख ४६ हजार ५ सय २२ रुपैया मूल्य बराबरको तस्करीको सामान बरामद बरामद गरेर आवश्यक कारवाहीको लागि वीरगन्ज स्थित भन्सार कार्यालयमा पठाएको जनाएको छ । २०७८ माघ महिनामा ६२ लाख ४७ हजार २ रुपैया, फागुन महिनामा एक करोड १४ लाख ३६ हजार १ सय ४७ रुपैया तथा चैत महिनामा ४ करोड ४३ लाख ६३ हजार ३ सय ७३ रुपैया गरि छ करोड २० लाख ४६ हजार ५ सय २२ रुपैया मूल्य बराबरको तस्करीको सामान भन्सार कार्यालयमा बुझाएको जनाएको छ ।
त्यसैगरि यि तीन महिनाको अवधिमा १११.५० केजी गाँजा, ४.८७० केजी चरेश, ३ केजी अफिम, १०० मिलीग्राम ब्राउनसुगर, ६ ट्याब्लेट डाइजोपाम, २ एम्पुल नुर्फिन, ६ एम्पुल फेनागरन, ७१८ एम्पुल नाइट्रोभेट सहित यस कार्यमा संलग्न २० जना व्यक्तिलाई पक्राउ गरि सम्बन्धित निकायलाई आवश्यक कारवाहीको लागि बुझाएको सशस्त्र प्रहरी पर्साले जनाएको छ । त्यसैगरि कटुवा पेस्तोल १ थान, त्यसमा प्रयोग हुने ७.६२ मि.मि. राउण्ड १ थान बरामद गरि जिल्ला प्रहरी कार्यालयमा पठाएको जनाएको छ ।